Hækkun á verði íbúða í fjölbýli

Íbúðaverð á höfuðborgarsvæðinu hækkaði um 0,9 prósent í september síðastliðnum miðað við fyrri mánuð. Hækkunina í síðasta mánuði má að öllu leyti rekja til 2,5 prósenta hækkunar á íbúðaverði í fjölbýli.

Í september í fyrra hafði íbúðaverð á höfuðborgarsvæðinu hækkað um 0,2 prósent frá fyrri mánuði.

Frá þessu er greint í Morgunkorni Íslandsbanka.

Þar segir að svo mikil hækkun á verði íbúða í fjölbýli hafi ekki orðið á milli mánaða síðan í maí árið 2011.

„Allt önnur þróun varð á verði sérbýla á sama tíma, sem lækkuðu á milli mánaða um 2,5 prósent. Þetta er í fyrsta sinn síðan í byrjun árs sem verð sérbýla lækkar á milli mánaða, og í raun hefur lækkunin ekki orðið eins mikil og nú síðan um mitt árið 2010. Þó ber hér að hafa í huga að talsverðar sveiflur eru í mælingum á milli mánaða og betra að horfa í þróunina til lengri tíma þegar greina á hvert markaðurinn er að fara. Þetta má sjá tölum sem Þjóðskrá Íslands tekur saman um vísitölu íbúðaverðs á höfuðborgarsvæðinu, og birti undir lok síðustu viku,“ segir í Morgunkorninu.