Harmageddon

Sannleikurinn: Ómar Ragnarsson handsamaður

Andri Þór Sturluson skrifar
Lögreglunni hefur loksins tekist að klófesta Ómar Ragnarsson en hann er sakaður um umfangsmikla landvernd.
Lögreglunni hefur loksins tekist að klófesta Ómar Ragnarsson en hann er sakaður um umfangsmikla landvernd. Mynd: Halldór Högurður
Ómar Ragnarsson, einn hættulegasti maður landsins og höfuðpaurinn í skipulögðu glæpasamtökunum Náttúruvernd Íslands, var handtekinn rétt í þessu af hugdjörfu þjónum réttlætisins, lögreglunni á höfuðborgarsvæðinu.

Ómar var staddur í Gálgahrauni að undirbúa hryðjuverk en lögreglan telur að hann hafi ætlað sér að skemma jarðýtu með því að leggjast í veg fyrir hana og flækjast í hjólabúnaðinum.

Lögreglan hefur nú sett upp vegatálma og bannar umferð um Álftanesveg við Gálgahraun til að stöðva mótmælendur sem vilja ekki umferð um nýjan Álftanesveg við Gálgahraun.

Lögreglan handtók yfir 20 manns sem allir eru taldir tilheyra hryðjuverkasellu undir stjórn Ómars Ragnarssonar en fólkið sat ógnandi fyrir framan vinnuvélarnar, söng og drakk kaffi. Þá var Eiði Guðnasyni, fyrrum ráðherra sem heldur úti vefsíðu um Mola og málfar miðla, hrint af lögreglu þegar hann leiðrétti málfarsvillu lögreglumanns.

Búist er við því að fjöldi fólks muni nú ganga til liðs við hryðjuverkamennina í Gálgahrauni enda finnst mörgum ömurlegt að hugsa til þess að búa í samfélagi þar sem Ómar Ragnarsson er handtekinn. Í raun má segja að með því að handtaka Ómar hafi lögreglan og verktakarnir tapað slagnum.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  þar sem Ómar er velkominn.



Velkomin á Vísi. Þessi vefur notar vafrakökur. Sjá nánar.