Auglýsa stöðu framkvæmdastjóra SI um helgina

Staða framkvæmdastjóra Samtaka iðnaðarins verður auglýst í dagblöðum á laugardaginn.

Þetta segir Svana Helen Björnsdóttir, formaður Samtaka iðnaðarins, en stjórn samtakanna fundaði um málið fyrr í dag.



„Þegar þetta ferli fer í gang þá tekur eitt við af öðru og við munum vinna þetta með ráðningarstofu sem verið er að velja núna. Takmarkið er að hafa þetta faglegt og gagnsætt ferli,“ segir Svana. 

Svana segir samtökin vonast til þess að niðurstaða fáist í málið fyrir miðjan nóvember.

„Umsóknarfresturinn verður ekki nema ein vika og menn verða því að drífa sig ef þeir ætla að sækja um," segir Svana og bætir því við að nýr framkvæmdastjóri komi til með að þurfa að sinna fjölmörgum verkefnum sem séu í burðarliðnum.

Eins og komið hefur fram ætlar Orri Hauksson, fráfarandi framkvæmdastjóri, að taka við forstjórastöðu fjarskiptafyrirtækisins Skipta.