Stærsta einstaka farminum skipað út frá Þörungaverksmiðjunni

Á dögunum lagði flutningaskipið Haukur að bryggju á Reykhólum til að lesta 1.600 tonn af lausu þaramjöli sem dælt var úr sílóum Þörungaverksmiðjunnar á staðnum og flutt til Noregs. Um ákveðin tímamót var að ræða í tvennum skilningi. Annars vegar var um að ræða stærsta einstaka farm sem skipað hefur verið út á vegum Þörungaverksmiðjunnar og hins vegar komu undirverktakar í fyrsta sinn að útskipun fyrir fyrirtækið.

Um verkið sáu starfsmenn frá Skipaafgreiðslu Vestfjarða, sem er nýstofnað dótturfélag skipaafgreiðslunnar Kletts í Hafnarfirði, og voru starfsmenn Þörungaverksmiðjunnar þeim til aðstoðar, þar sem þetta var í fyrsta sinn sem utanaðkomandi aðilar sáu um meðhöndlun afurðanna.

Stjórnendur Þörungaverksmiðjunnar og Kletts eiga nú í viðræðum um að starfsmenn Skipaafgreiðslu Vestfjarða taki að sér útskipun á afurðum Þörungaverksmiðjunnar frá höfninni á Reykhólum. Náist samningar sjá starfsmenn verksmiðjunnar fram á að geta einbeitt sér alfarið að framleiðslu fyrirtækisins með því að útvista hafnarstörfunum til undirverktaka. Síðar kæmi hugsanlega einnig til greina að fela undirverktökum löndun á hráefni Þörungaverksmiðjunnar, sem eru þari og þang úr Breiðafirði. Á vegum Þörungaverksmiðjunnar er einnig hafin vinna við að skoða möguleika þess að afla Gretti, flutningaskipi fyrirtækisins, frekari verkefna við Breiðafjörð og Vestfirði.

Klettur í Hafnarfirði hefur í mörg undanfarin ár sinnt hafnarstörfum við útskipanir og landanir fyrir viðskiptavini sína á Vestfjörðum, einkum Íslenska kalkþörungafélagið á Bíldudal auk Saltkaupa en félagið á ennfremur í viðræðum við önnur fyrirtæki á Vestfjörðum. Með stofnun Skipaafgreiðslu Vestfjarða hyggst fyrirtækið festa sig betur í sessi sem þjónustuaðili á suðurfjörðum Vestfjarða og mun fyrirtækið á næstunni opna starfsstöð á svæðinu.