Harmageddon

Sannleikurinn: Fjárlagafrumvarpið fær 2 stjörnur

Andri Þór Sturluson skrifar
Ræða Ólafs við þingsetninguna var svo leiðinleg að þingmenn fengu að skrifa á sig yfirvinnu.
Ræða Ólafs við þingsetninguna var svo leiðinleg að þingmenn fengu að skrifa á sig yfirvinnu.
Alþingi var sett í gær. Mikil löggæsla var við þinghúsið enda 63 hættulegustu menn þjóðarinnar að mæta til vinnu eftir frí. 

Þingsetningarathöfnin hófst kl 13:30 með guðþjónustu í Dómkirkjunni fyrir þá þingmenn sem óttast að enda í helvíti eftir dauða sinn vegna starfa sinna á þinginu.

Lögreglan á höfuðborgarsvæðinu var með töluverðan viðbúnað og setti upp varnargirðingu við Alþingishúsið enda margir öryrkjar og bótaþegar í mótmælendahópnum fyrir utan en það er sá hópur sem þingmenn ráðast oftast á. Ólafur Ragnar Grímsson, forseti, talaði síðan um sjálfan sig í hálftíma ávarpi sínu. 

Bjarni Benediktsson, fjármálaráðherra, kynnti fjárlagafrumvarp ríkisstjórnarinnar fyrir árið 2014. Nýju fjárlögin gera ráð fyrir því að kjósendur ríkisstjórnarflokkanna séu sauðir. Sérstaklega sjúklingar en þá þarf að rýja inn að skinni. 

Gert er ráð fyrir því að ríkissjóður skili tæplega 500 milljón króna afgangi á næsta ári. Ríkisstjórnin mun ná því markmiði með því að beita svokallaðri „barnalegri nálgun“ að sögn fjármálaráðherra en sú aðferð reyndist vel í kosningabaráttu Framsóknarflokksins. 

Fjárlagafrumvarpið er strax orðið umdeilt þrátt fyrir að það innihaldi mörg fagnaðarefni. T.d. gæti nýr skattur á þrotabú gömlu bankanna skilað 11,3 milljörðum króna. Í raun er óskiljanlegt að það sé þessi ríkisstjórn en ekki vinstri velferðarstjórnin sem fann upp á því snjallræði að skattleggja slitastjórnir. Gert er ráð fyrir að fjölga um fimm rannsóknarlögreglumenn í kynferðisbrotadeild lögreglunnar sem gæti loksins skilað sakfellingu í nauðgunarmáli. Skólagjöld í Háskóla Íslands verða hækkuð um 25 prósent sem fækkar vonandi í nemendahópnum um einhverja fátæka aumingja sem keppa myndu um störf við þá efnameiri. Bleyjuskattur er lækkaður á einnota bleyjum niður í 7 prósent sem ætti að koma stjórnmálamönnum, lögreglumönnum, lögfræðingum, millistjórnendum og öðrum, sem skíta á sig reglulega, mjög vel. Einnig er áfengisgjald hækkað þannig að landaframleiðsla verður loksins arðvænleg. 

Annað er ekki eins gott. RÚV fær 319 milljónir aukalega og ekki er farið fram á hagræðingu þar, sem þýðir að við losnum varla við Gunnar á Völlum á næstunni. Landspítalinn fær ekki aukið rekstarfé og hætt er við 600 milljón króna tækjakaupaframlag. Það þýðir að aukin áhersla verður lögð á dauðsföll innan heilbrigðiskerfisins en aukning þeirra gæti sparað heilbrigðiskerfinu mikið fé. Þá er kveðið á um nýtt legugjald, 1200 krónur fyrir hvern sólarhring sem dvalið er á Landspítalanum en jákvætt er að maður þarf ekki að greiða gjaldið ef maður deyr þar. Öllum fjárframlögum til lista, annarra en D og B lista verður hætt og kvikmyndagerðarmönnum bent á að leita til smálánafyrirtækja vilji þeir ekki hætta þessu rugli og fá sér alvöru vinnu. Loks fær Guð almáttugur, skapari himins og jarðar, hækkun um 44,5 milljónir króna til að standa straum af ýmsum kostnaði sem fylgir því að plata fyrrverandi fíkla og deyjandi gamalmenni til að trúa því að lífið verði strax betra um leið og maður hættir að lifa því. 

Margir hafa lýst yfir hneykslun sinni á forgangsröðun ríkisstjórnarinnar. Háværar eru raddir fyrrverandi ráðherra sem eru æfir yfir því að ný ríkisstjórn skuli ekki gera allt það sem vinstri stjórnin sveikst um að gera þau fjögur ár sem hún stjórnaðu landinu. Árni Páll Árnason, formaður Samfylkingarinnar, er ekki bjartsýnn á tillögurnar. Hann segir nýju fjárlögin ekki taka á neinum vandamálum sem hann og samráðherrar hans hunsuðu seinasta kjörtímabil.

„Vinstri stjórnin gerði lítið sem ekkert fyrir Landspítalann, löggæslu, öryrkja og lífeyrisþega, skuldsettu heimilin og stúdenta í fjögur ár. Nú ætlar ný ríkisstjórn bara að halda þeirri stefnu áfram,“ sagði hann.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en þar er búið að skera mikið niður.



Velkomin á Vísi. Þessi vefur notar vafrakökur. Sjá nánar.