Illa gert gagnvart Íslandi, skaðar norska hagsmuni

Einn kunnasti olíuráðgjafi Norðmanna segir það illa gert gagnvart Íslandi að norsk stjórnvöld falli frá olíuleit við Jan Mayen. Jafnframt sé það óforsvaranlegt út frá norskum hagsmunum ef olíulind fyndist sem næði yfir lögsögumörkin.

Til að tryggja sér forsætisráðherrastólinn og stuðning tveggja smáflokka við nýja ríkisstjórn hefur leiðtogi Hægri flokksins og sigurvegari norsku þingkosninganna, Erna Solberg, þvert á eigin stefnu, neyðst til að fallast á kröfu þeirra um að ekki verði leyfð olíuvinnsla við Norður-Noreg á umdeildum svæðum við Lófót, Senju og í Vesturál. Það sem kemur hins vegar meira á óvart er að nýja hægri stjórnin hyggst hætta við að opna Jan Mayen-svæðið til olíuvinnslu, öfugt við það sem rauðgræna ríkisstjórn Jens Stoltenbergs hafði ákveðið.

Hans Henrik Ramm, sem er einn kunnasti ráðgjafi og dálkahöfundur Noregs um olíugeirann, telur þessa ákvörðun um Jan Mayen ekki skaða olíugeirann verulega en segir jafnframt í nýrri greiningu:

„Hins vegar er þetta illa gert gagnvart Íslandi, sem hafði vonast eftir samlegðaráhrifum og norskri aðstoð við það að olíustarfsemi hæfist beggja vegna lögsögumarkanna." Hann bætir við:

„Ég tel einnig að þetta sé óforsvaranlegt út frá norskum hagsmunum." Og spyr síðan: „Hvað gerum við ef það verður stór olíufundur sem teygir sig yfir á norska hlutann?“

Greinilegt er að Hans Henrik er kunnugt um að líklegar olíulindir Jan Mayen-svæðisins eru taldar ná yfir miðlínuna og óttast að það geti sett Norðmenn í vanda fari Íslendingar að nýta þær.