Fjögurra milljóna risasjónvarp í Hátækni

Verslunin Hátækni tók nýverið til sölu sannkallað risasjónvarpstæki. Um er að ræða LG 84" sjónvarpstæki en til stærðarsamanburðar þá er það eins og fjögur 42" sjónvarpstæki að flatarmáli.

Upplausnin er í svokölluðu „Ultra High Definition“ sem er glæný tækni og u.þ.b. fjórum sinnum öflugri en „FullHD“. Að auki við þessa gríðarlegu stærð býður sjónvarpið m.a. upp á 3D-virkni, SmartTV og SmartShare sem gerir notendum kleift að deila efni úr snjallsímum og spjaldtölvum beint yfir í sjónvarpið.

„Við vorum að fá þetta sjónvarpstæki í hús. Við höfum hingað til mest farið upp í 65" sjónvarpstæki þannig að við erum að toppa okkur,“ segir Daníel Sigurðsson, verslunarstjóri hjá Hátækni. Hann segir að stærðin sé ekki lykilatriðið við sjónvarpstækið heldur sú ótrúlega upplausn LG LED hefur yfir að ráða.

„Þetta er fjórum sinnum öflugra [2160p] en hefðbundin háskerpa. Það er ekkert sambærilegt tæki á markaðnum í dag. Þeir sem vilja skyggnast inn í framtíðina í sjónvarpstækjum ættu að kíkja til okkar.“

Kostar tæpar fjórar milljónir

Það er ekki á færi margra að kaupa þetta nýja risasjónvarpstæki. Það kostar rétt tæpar fjórar milljónir króna hjá Hátækni. Það liggur því beinast við að spyrja hvort að það sé eftirspurn hér á landi eftir sjónvarpi sem er dýrari en einkabílinn hjá flestum fjölskyldum?

„Það er klárlega markaður til staðar. Þetta tæki er t.d. kjörið fyrir funda- og ráðstefnusali. Við erum ekki búnir að selja eitt eintak ennþá en það hafa verið þreifingar á síðustu dögum,“ segir Daníel. Hér að neðan má sjá myndband um þetta risasjónvarp.