Bjarni vill að ríkið haldi 35-40% í Landsbanka eftir skráningu

Bjarni Benediktsson fjármálaráðherra vill selja eignarhluti ríkisins í Íslandsbanka og Arion banka og skrá Landsbankann á markað. Hann segir æskilegt að ríkissjóður fari með stóran hlut í Landsbankanum til langframa.

Bjarni Benediktsson fjármálaráðherra flutti ávarp á fundi Landsbankans sem bar yfirskriftina: Eru íslensk fjármálafyrirtæki spennandi fjárfestingarskostur?

Íslandsbanki og Arion banki þurfa nýja alvöru eigendur

Eitt af því sem bar á góma í ræðu Bjarna var framtíðarsýn hans fyrir aðkomu ríkisins að fjármálamarkaði. Bjarn segir að Íslandsbanki og Arion banki þurfi að fá nýja eigendur og komist úr eignarhaldi þrotabúa. Samhliða því geti ríkið losað hlut sinn í þeim.

„Fyrir Landsbankann þá sé ég fyrir mér að við getum á næstu arum skráð þann banka þegar endurfjármögnun hans er tryggð og að ríkið trappi síðan í rólegheitum niður sinn eignarhlut allt eftir því sem við teljum að skili ríkinu mestum arði,“ segir Bjarni.

Ef við horfum raunsætt á hlutina í ljósi þeirra hundruð milljarða króna sem ríkissjóður lagði í endurreisn bankakerfisins með víkjandi lánum og öðru, er ekki frekar ósennilegt að þessir peningar skili sér til baka, miðað við bókfært virði eigin fjár á bilinu 0,5-1? „Ég tel að ef menn vanda sig og reyni ekki að ná þessu öllu til baka í einu heldur vanda hvert skref og horfa heildstætt á þessa mynd þá sé það mjög raunhæft að ríkið fái til baka það sem fjárfest hefur verið í bönkunum.“

Bjarni segir að æskilegt sé að ríkissjóður haldi 30-40 prósenta hlut í bankanum varanlega eftir skráningu. Enn eru þó nokkrar hindranir í veginum svo ríkið geti losað um hlut sinn í Landsbankanum.

„Það þarf heimild í fjárlögum til þess fyrir utan þessa almennu lagaheimild. Bankinn verður að ná að endurfjármagna sig og við þyrftum að fá aðeins betri kraft í efnahagslífið almennt. Að þessu öllu saman gefnu þá tel ég rétt að hefja undirbúning að sölu ríkisins á þessum hlut og í því sambandi tel ég að það geti stuðlað að vel heppnaðri skráningu bankans.“

Afstaða Bjarna er efnislega sú sama og fyrrum fjármálaráðherra, Steingrímur J. Sigfússon hafði sett fram. Steingrímur lýsti þessu viðhorfi m.a í Klinkinu.

Jan Olsson hefur starfað hjá Deutsche Bank í aldarfjórðung og kemur reglulega til Íslands. Hann stýrir starfsemi Deutsche Bank á Norðurlöndunum.

Fyrir hrunið þegar lánsfjármagn var nær ókeypis og allir íslensku bankarnir skiluðu milljarða hagnaði skapaðist samt nær engin eftirspurn frá erlendum fjárfestum eftir hlutabréfum þeirra.

Arðurinn var til staðar erlenda fjárfestingu skorti þá. Hví skyldu erlendir aðila vilja fjárfesta hér í framtíðinni?

„Í fyrsta lagi hafið þið endurskipulagt fjármálakerfið, þið hafið stofnað nýja banka og byggt upp nýtt fjármálakerfi. Við höfum það á tilfinningunni að möguleikarnir séu fyrir hendi. Ég er ekki skyggn og sé ekki framtíðina í smáatriðum. En ef á heildina er litið er það okkar tilfinning að þið hafið skipað hæfar stjórnir og komið á góðu stjórnunarfyrirkomulagi og sett á stofn hæfar stofnanir,“ segir Jan Olsson, framkvæmdastjóri Deutsche Bank á Norðurlöndunum.