Helmingur vinnuafls er kvenfólk

Vigdís Hauksdóttir, þingmaður og formaður fjárlaganefndar, telur lífeyrissjóðina síst of góða til að fylgja reglum um kynjakvóta í stjórnum sjóðanna.

Framkvæmdastjóri Landssamtaka lífeyrissjóða segir að lög sem snúa að kynjahlutfalli í stjórnum lífeyrissjóða kunni að ganga of langt og býst við að funda með núverandi stjórnvöldum vegna málsins. Þetta hefur komið fram í fréttum. Framkvæmdastjórinn segir lögin ekki hönnuð með hagsmuni lífeyrissjóðanna að leiðarljósi. Enn uppfylla sjö lífeyrissjóðir ekki skilyrði laganna, sem tóku gildi í fyrradag.

Vigdís botnar ekkert í þessum málflutningi. Aðspurð hvort hún sé fylgjandi kynjakvótum almennt segir hún að persónuleg skoðun sín í þeim efnum skipti ekki máli.

„Nú er búið að lögleiða lög um kynjakvóta í stjórnir félaga og lífeyrissjóða. Þetta eru þau lög sem við búum við í dag og hljótum að bregðast við með því að uppfylla þau lög."

Vigdís telur þetta undanbrögð af hálfu Þóreyjar Þórðardóttur, framkvæmdastjóra landsamtaka lífeyrissjóða. „Já. Ég átta mig ekki á því hvert er verið að fara. Helmingur vinnuafls er kvenfólk. Gagnrýnin snýr að því að ekki séu til nógu margar hæfar konur til að sitja í stjórnum lífeyrissjóðanna. Þetta er umræða sem ég átta mig ekki á. Það er litið svo á að konurnar geti ekki komið þarna inn af því að þeir eru ekki í tilteknum lífeyrissjóðum? Stjórnir lífeyrissjóða eiga að vera eins og stjórnir fyrirtækja. Það á að sækja fólk út fyrir hópinn ef ekki vill betur. Til að koma inn með þekkingu inn í stjórnina. Til að lífeyrissjóðirnir séu sem best reknir. Um það gilda sömu lögmál og fyrirtæki á almennum vinnumarkaði."