Farþegum Icelandair fjölgaði um 11%

Icelandair flutti 300 þúsund farþega í millilandaflugi í ágúst síðastliðnum. Farþegar flugfélagsins voru 11% fleiri en í ágúst á síðasta ári. Þetta kemur fram í tölum sem fyrirtækið sendi á fjölmiðla.

Þar segir að sætanýting í ferðum flugfélagsins hafi verið 85,6% borið saman við 84,9% í ágúst 2012. Farþegum fjölgaði mest á Norður-Atlantshafsmarkaðinum, um 16,4%, og voru þeir 52% af heildarfarþegafjölda Icelandair í millilandaflugi í mánuðinum.

„Farþegar í innanlandsflugi og Grænlandsflugi voru tæplega 33 þúsund í ágúst og fækkaði um 12% á milli ára. Framboð félagsins í ágúst var dregið saman um 13% samanborið við ágúst 2012. Sætanýting nam 73,5% og jókst um 3,5 prósentustig á milli ára. Seldum blokktímum í leiguflugi fækkaði um 10% á milli ára. Fraktflutningar jukust um 12% frá því á síðasta ári. Fjöldi seldra gistinátta á hótelum félagsins jókst um 2% milli ára. Herbergjanýting var 88,2% samanborið við 88,1% í ágúst í fyrra.“