2,2 milljarða hagnaður Reita: „Þokunni er að létta"

Heildarhagnaður af rekstri Reita fasteignafélags hf. nam rúmum 2,2 milljörðum króna á fyrstu sex mánuðum ársins. Þetta eru niðurstöður úr árshlutareikningi samstæðunnar.

Eigið fé samstæðunnar í lok júní var rúmir 15,1 milljarður króna samkvæmt efnahagsreikningi.

Guðjón Auðunsson, forstjóri Reita fasteignafélags hf. segir að rekstur Reita sé í mjög góðu standi og góðu jafnvægi eins og tölurnar úr árshlutareikningnum bera með sér.

Hann segist horfa björtum augum til framtíðar. Það megi segja að það hafi verið lægð yfir landinu en það sé að létta til. „Þokunni er að létta, það er samt smá mistur ennþá,“ segir Guðjón.

„Við erum að skila fyrstu sex mánuðum ársins í mjög góðu standi og í takt við áætlanir félagsins. Það er ekkert sem kemur á óvart í uppgjörinu, rekstrarhagnaður er jafnvel örlítið yfir væntingum og sömuleiðis leigutekjur,“ segir Guðjón.

„Tölurnar eru mjög stórar í okkar tilfelli vegna þess að eignasafnið er mjög stórt. Við erum að endurmeta fjárfestingar félagsins upp á 2,2 milljarða króna sem er meginskýringin á stórri hagnaðartölu eftir skatta,“ segir hann.

Meðal þekktra fasteigna í eigu Reita eru Kringlan, Hótel Nordica, Hótel Natura, Kauphallarhúsið og Holtagarðar. Reitir er einnig stærsti eigandi fasteigna í miðborg Reykjavíkur og eiga til dæmis gamla Pósthúsið, Aðalstræti 12 og húsið þar sem Kaffi París er.