"Ísland fær tengingu við umheiminn sem er án fordæma“

Lífæð Íslands eflist margfalt þegar nýr sæstrengur verður tekin í notkun á haustmánuðum næsta árs. Sérfræðingur í rekstri sæstrengja segir tengimöguleika landsins eflast gríðarlega með þessu og að Ísland sé nú með bestu stöðum veraldar til að reka gagnaver.

Sem stendur eru sæstrengirnir fjórir. Farice og Danice bera þungan af fjarskiptaþörf okkar en sá síðarnefndi liggur frá Landeyjum til Danmerkur. Markmið Danice er að styðja við rekstur netþjónabúa á Íslandi. Farice liggur aftur á móti frá Seyðisfirði til Færeyja og þaðan til Skotlands. Strengirnir tveir eru í eigu Farice ehf. en stærstu hluthafar í fyrirtækinu eru íslenska ríkið íslenska ríkið (28.07%), Landsvirkjun (26.69%) og Arion banki (43.47%).

Rekstri Cantat-3 sæstrengsins var hætt árið 2019 en lá á milli Evrópu, Íslands og Kanada. Fjórði strengurinn er Greenland Connect. Hann liggur frá Landeyjarsandi, til Nuuk á Grænlandi og þaðan til Kanada. Greenland connect er alfarið í eigu Tele Greenland, stærsta fjarskiptafyrirtækisins Grænlands.

Bandvídd Farice og Danice er hundrað gígabit og sekúndu. Sem stendur er um helmingur bandvíddar þeirra í notkun hér á landi, eða 45 prósent á Farice og 55 prósent á Danice.

Íslensk fjarskiptafyrirtæki nota mestu bandvíddina eða rúm 41%. Erlend fjarskiptafélög nýta 15% en sautján prósent fara í rannsóknir og háskólanet. Árið 2011 notuðu gagnaver og viðskiptavinir þeirra 27 prósent bandvíddarinnar.

Gríðarleg tækifæri eru fólgin í þessum síðasta lið og hefur Íslandi verið hampað sem ákjósanlegasta stað veraldar þegar kemur að rekstri gagnavera. Það sem stendur í vegi er takmörkuð flutningsgeta.

Vodafone undirritaði í dag samning sem tekur til afnota á sæstreng tæknifyrirtækisins Emerald Networks. Strengurinn verður tekinn í notkun haustið 2014. Honum fylgir flutningsgeta upp á um eitt terabæt á sekúndu og er fyrsti sæstrengurinn sem lagður er á milli Norður-Ameríku og Evrópu í fimmtán ár.

„Þessi sæstrengur verður með afkastamestu sæstrengjum sem liggja milli Norður-Ameríku og Evrópu.  Það veitir okkur möguleika að margfalda flutningsgetu okkar og koma þannig til móts við þörf markaðarins fyrir auknum gagnaflutningi,“ Ómar Svavarsson, forstjóri Vodafone.

Emerald Express mun ná frá New York til Írlands en með viðkomu í Grindavík. Strengurinn er 6.700 kílómetrar. Það er íslenska fyrirtækið Thule Investments sem sér um fjármögnun strengsins á Íslandi.

Philip Magiera undirritaði samninginn fyrir hönd Emerald Networks. Á undanförnum misserum hefur Emerald rætt við stærstu tæknifyrirtæki veraldar um framtíðarhorfur í rekstri gagnavera.

„Allir sem við höfum talað við vita að Ísland er sennilega eitt af bestu löndum í heimi til að hýsa gagnaver,“ segir Magiera. „Vandamálið varðandi Ísland hefur verið tengingin. Nú fær Ísland tengingu við umheiminn sem á sér ekki fordæmi."