Leggja fram tillögu að uppbyggingu á SÍF-reitnum

Búseti hsf og Knattspyrnufélag Reykjavíkur hafa hug á að gera breytingar á skemmunni við Keilugranda 1 í Vesturbæ Reykjavíkur og  vilja reisa fjölnota íþróttahús, íbúabyggð og almenningsgarð.

Íbúðirnar verða í randbyggingu sem myndar skjólgarð en undir honum verður að finna bílakjallara. Miðað við frumdrög sem lögð hafa verið fram mætir tillagan þeim fjölda íbúða sem aðalskipulag leggur upp með. Þar er um að ræða 75 íbúðir í ýmsum stærðum.

Á suðurhluta reitsins er gert ráð fyrir að rísi fjölnota íþróttahús sem verður að hluta til niðurgrafið þar sem markmiðið er að lágmarka sjónræn áhrif nýbyggingar að aðliggjandi byggð.

Á þaki þessa íþróttahúss verður almenningsgarður. Samkvæmt hugmyndinni verður hægt að nýta hann til íþróttatengdrar iðkunar, til dæmis minigolf eða brettavöll.

Jónas Kristinsson, framkvæmdastjóri Knattspyrnufélags Reykjavíkur segir Búseta og KR hafa verið að ræða saman um SÍF-reitinn.

„Við KR-ingar höfum verið í viðræðum við Búseta en einnig við borgina, síðan árið 2008, um hvernig megi nýta þennan reit og byggja hann upp, án þess að úr verði eitthvað skrímsli,“ segir Jónas.

Búseti er húsnæðissamvinnufélag sem er rekið án hagnaðarsjónarmiða. Þörf félagsins á húsnæði í vesturbænum er mikil en af þeim 720 íbúðum á höfuðborgarsvæðinu eru engin innan póstnúmersins 107.

Fulltrúar Búseta og KR telja að hér sé um að ræða verkefni sem gæti skapað gæði og verðmæti fyrir íbúa hverfisins ásamt því að efla starf og uppbyggingu KR.

Þetta sé því ákjósanleg leið til að stuðla að styrkingu hverfistengdrar þjónustu borgarinnar, markmiðum aðalskipulags, ásamt því að bjóða upp á húsnæði á viðráðanlegum kjörum.

Borgarráð hefur nú vísað málinu til húsnæðishóps en hann á að skila tillögum sínum í september.

„Hugmyndir okkar og þetta samstafsmódel með Búseta held ég að sé og verði mjög þarft og skemmtilegt. Við viljum tryggja það að Vesturbæingar fái fallega götumynd og áframhaldandi góða þjónustu frá KR,“ segir Jónas jafnframt.

„Um leið lokast fyrir þær raddir sem stundum hafa heyrst um að hér eigi að rísa stór mannvirki. Hugmyndin er á frumstigi, en teikningarnar eru spennandi og vonandi hægt að vinna áfram með þær,“ segir Jónas að lokum.