ESB ávítar Google

Joaquin Almuna, samkeppnisstjóri framkvæmdastjórnar Evrópusambandsins, segir að leitarþjónustan Google hafi engan veginn lagt sig nægilega fram við að draga úr áhyggjum samkeppnisaðila sinna.

Evrópusambandið hefur haft til rannsóknar hvort Google misnoti sér yfirburðastöðu sína á markaðnum. Í Evrópuríkjum er Google með 90 prósent markaðshlutdeild.

Google hefur reynt að koma til móts við þetta, en einkum þó með því að breyta því hvernig leitarniðurstöður eru settar fram.

Almuna hefur undanfarið skoðað viðbrögð Google og rætt við önnur fyrirtæki, og komist að þeirri niðurstöðu að meira þurfi til.

„Niðurstaða mín er sú að tillögurnar, sem Google sendi okkur fyrir nokkrum mánuðum, dugi ekki til að draga úr áhyggjum okkar,” sagði Almuna í morgun. Hann sagðist hafa sent bréf til Google og beðið um betri tillögur.