Tímamótasigur hjá Datacell og Wikileaks

Valitor hefur framlengt þjónustu sína til fyrirtækisins Datacell sem sá um að færsluhirðingar í þágu Wikileaks. Áfangasigur segir lögmaður fyrirtækisins, sem undirbýr nú skaðabótamál gegn fyrirtækinu.

Það var í apríl síðastliðnum sem Hæstiréttur Íslands staðfesti að Valitor hefði verið óheimilt að loka fyrir greiðslugátt Datacell sem tók við fjárframlögum til WikiLeaks.

Að sögn Sveins Andra Sveinssonar, lögmanns Datacell, opnaði fyrirtækið greiðslugáttina eftir að dómur féll, en tilkynntu á sama tíma að þeir hygðust segja samningum upp við Datacell. Kortafyrirtækið hefur nú sent frá sér tilkynningu þar sem kom fram að þeir hefðu hætt við að loka fyrir greiðslugáttina nú um helgina.

„þeir tilkynntu, eftir að þeir opnuðu gáttina, um uppsögn samningarins við Datacell, en við mótmælum því harðlega.“

Segir Sveinn Andri og vitnar þá í reglur um skyldur til samningsgerðar og bætir við að engar málefnalegar ástæður liggi að baki uppsögninni.

Málinu er því alls ekki lokið, auk þess sem Datacell og WikiLeaks undirbúa skaðabóta mál. „Wikileaks og Datacell líka hafa orðið fyrir gríðarlegu fjárhagslegu tjóni og ljóst að við munum halda bótakröfu að valitor vegna þessa tjóns,“ segir Sveinn Andri.

Niðurstaðan nú er þó stórt skref í baráttu Datacell og WikiLeaks í áttina að safna fjárframlögum.  

„Þetta er tímamótasigur hjá okkar umbjóðendum,“ segir Sveinn Andri.

Hér fyrir neðan má lesa tilkynningu frá Valitor vegna málsins:

Valitor hefur tilkynnt Datacell að fallið hafi verið frá lokun á greiðslugátt til fyrirtækisins frá og með miðnætti 30. júní, eins og tilkynnt hafði verið um í apríl síðastliðnum.

Ástæður breyttrar afstöðu Valitor eru:

Í fyrst lagi að MasterCard hefur heimilað Valitor að veita Datacell þjónustu á sviði færsluhirðingar með MasterCard kortum í þágu WikiLeaks.

Í öðru lagi vegna þess að MasterCard og Visa EU hafa í tæpt ár látið það óáreitt að Card de Bleue í Frakkland annist færsluhirðingar með MasterCard og Visa í þágu WikiLeaks.

Valitor er í starfsemi sinni bundið af skilmálum MasterCard og Visa EU og getur því þurft að rjúfa samning sinn við DataCell að kröfu þessara aðila til að tryggja að öðru leyti örugg og ótrufluð kortaviðskipti hér á landi.

Valitor tekur sem fyrr ekki afstöðu til starfsemi Wikileaks eða ágreinings samtakanna við alþjóðleg fjármálafyrirtæki.