Sæmundur í Veiðivötnum

Jón P. Guðjónsson veiðimaður er nýlega kominn úr Veiðivötnum ásamt vinum úr veiðifélaginu Sæmundi. Veiðivísir greindi frá fremur dræmri opnun á þessum sögufræga stað og fór þess á leit við Jón að hann segði af ferðinni. Þetta er 29. árið í röð sem þeir fara inn að Veiðivötnum með óbreytt lið, eða allt frá árinu 1984. En, það fer best á því að gefa Jóni orðið:

"Við erum kannski ekki þeir sem menn myndu miða við ef verið er að tala um toppveiðitölur því síðari árin (áratugina) hefur ferðin snúist meira um frábæran félagskapinn hjá góðum vinum ásamt góðum viðurgjörningi í mat og drykk og ekki staðið við allan daginn eins og fyrstu árin.

Oft höfum við þó veitt vel og stóra fiska, veiðin hefur farið mest í um 300 fiska á þessum þrem dögum og niður í þessa 8 sem við fengum núna.

Reyndar hefðum við getað veitt helling af smábleikju sem ræður orðið ríkjum í sumum vatnanna en við gáfum okkur ekki tíma í það núna.

Þó auðvitað eigi hvetja menn til að fara og moka henni upp til að reyna að sporna við fjölgun á þessum ágæta fiski sem hefur þann vafasama eiginleika að fjölga sér ótrúlega hratt og vera ofurfljót að aðalagast aðstæðum.

Eins og sést víða inná hálendinu þar sem Bleikju var því miður sleppt á sínum tíma á Tungnársvæðinu - ekki samt á Veiðivatnasvæðinu - hálf gert unmhverfisslys.

En við fengum semsagt 8 ágæta fiska stærst 2,2 kg þetta tíndist uppúr Breiðavatni, Litla Breiðavatni Litlasjó og Hraunvötnum.

Og þessi ferð var eins góð og þær 28 sem við höfðum farið saman vinirnir og ég hlakka ótrúlega til ferðarinnar á næsta ári."