Svört skýrsla um Eir: Sagðir hafa eytt milljónum í utanlandsferðir

Í skýrslu sem endurskoðunarfyrirtækið Deloitte gerði um rekstur hjúkrunarheimilsins Eirar kemur meðal annars fram að forstjóri heimilisins Sigurður Helgi Guðmundsson, auk fjármálastjórans og forstjóra, hafi nýtt tæplega þrjár milljónir króna af fé heimilisins í flugferðir, gistingu og veitingar erlendis.

Deloitte fór yfir afrit af reikningum sem greiddir voru úr þróunarsjóði á árunum 2009-2011. Greiðslurnar námu samtals 2,7 milljónum króna og voru vegna dagpeninga, flugferða, gistinga og veitinga erlendis.

Í skýrslunni segir að greiðslurnar tengist fyrrverandi forstjóra Eirar og fjölskyldumeðlimum hans, fyrrverandi fjármálastjóra Eirar og maka  hans, fyrrverandi framkvæmdastjóra rekstrar og fyrrrverandi starfsmanni Eirar.

Allar greiðslurnar voru samþykktar, ýmist af forstjóra eða fjármálastjóra.

Í skýrslu Deloitte segir að ekki hafi verið sýnt fram á að greiðslurnar tengist rekstri hjúkrunarheimilsins með beinum hætti.

Eir skuldar um 8 milljarða en laust fé er nánast uppurið. Af átta milljörðum skuldar Eir sex milljarða til lánadrottna, íbúðalánasjóðs og lífeyrissjóða, sem lánuðu fyrir uppbyggingu á fasteignum félagsins gegn veðum í eignunum.

Fréttastofa Stöðvar 2 fjallaði ítarlega um málið á síðasta ári.

Þá kom meðal annars fram að Ríkisendurskoðandi gaf Sigurði Helga færi á að endurgreiða 200 þúsund króna sólarlandaferð sem hann gaf tengdasyni sínum úr bleyjusjóði hjúkrunarheimilisins fyrir meint lögmannsstörf.

Um þetta er fjallað í skýrslunni, en þar segir að færsla afsláttar í bókhaldi vegna bleyjusjóðsins, hafi ekki verið í samræmi við lög.

Hér fyrir neðan má nálgast skýrsluna.