Bensínlítrinn hækkar um fjórar krónur

Olíufélögin hækkuðu verð á olíu og bensíni í morgun, hvora tegund um fjórar krónur á lítrann. Bensínlítrinn er aftur kominn yfir 250 króna markið, eða í 251,10 og dísillítrinn er kominn hátt í 249 krónur. Hjá Skeljungi kostar bensínlítrinn 253,4 krónur.

Hækkunin lá í loftinu, með hliðsjón af lækkandi gengi krónunnar gagnvart dollar, en þessi viðskipti eru gerð í dollurum.

Þá hefur heimsmarkaðsverð einnig farið hækkandi, eins og jafnann í júlí, þegar sumarleyfaumferð er í hámarki á Vesturlöndum, einkum í þriðju viku mánaðarins. Við það bætist núna hækkun vegna ótryggs ástands í Egyptalandi.

Þegar allar þessar kennitölur eru bornar saman , virðast olíufélögin aðeins hafa dregið úr álagningunni en þau hafa legið undir ámæli, einkum Félags  íslenskra bifreiðaeigenda, fyrir að hafa hægt og sígandi verið að hækka bensínverð.