"Gamli" Magic kominn aftur

„Það var bara eftirspurn eftir því að fá gamla bragðið til baka,“ segir Stefán Magnússon, markaðsstjóri Vífilfells, sem framleiðir orkudrykkinn Magic.

Árið 2011 var uppskriftinni að drykknum breytt og dvínuðu vinsældir hans mjög við það. Vífilfell brá því á það ráð að hverfa aftur til fortíðar og hefur nú hafið framleiðslu á drykknum með upprunalegri uppskrift.

„Neytendur og viðskiptavinir Vífilfells kölluðu eftir þessu og við brugðumst bara við því, nýja bragðið gekk bara ekki upp," segir Stefán.

Drykkurinn var sá vinsælasti í sínum flokki um árabil en síðan komu fleiri tegundir á markaðinn. Í bland við aukna samkeppni og breytingar á uppskriftinni hjá Vífilfelli dróst salan á drykknum nokkuð saman.

Þetta er í ekki í fyrsta skiptið sem drykkjaframleiðendur hér á landi leita í gamlar uppskriftir. Fyrir nokkrum árum breytti Ölgerðin uppskriftinni að gosdrykknum Mix við litlar vinsældir neytenda. Árið 2009 leituðu þeir svo aftur í smiðju fortíðar og hófu að selja Mix með gamla bragðinu.