Vísitala neysluverð hækkaði

Vísitala neysluverðs miðuð við verðlag í júní 2013 er 413,5 stig (maí 1988=100) og hækkaði um 0,53% frá fyrra mánuði samkvæmt upplýsingum sem finna má á heimasíðu Hagstofunnar. Vísitala neysluverðs án húsnæðis er 393,6 stig og hækkaði um 0,59% frá maí.

Flugfargjöld til útlanda hækkuðu um 11,4% (vísitöluáhrif 0,17%) og kostnaður vegna eigin húsnæðis jókst um 0,8% (0,11%). Verð á bensíni og olíum hækkaði um 1,8% (0,10%).

Síðastliðna tólf mánuði hefur vísitala neysluverðs hækkað um 3,3% og vísitalan án húsnæðis um 3,4%. Undanfarna þrjá mánuði hefur vísitala neysluverðs hækkað um 0,7% sem jafngildir 2,8% verðbólgu á ári (1,1% fyrir vísitöluna án húsnæðis).

Vísitala neysluverðs samkvæmt útreikningi í júní 2013, sem er 413,5 stig, gildir til verðtryggingar í ágúst 2013. Vísitala fyrir eldri fjárskuldbindingar, sem breytast eftir lánskjaravísitölu, er 8.165 stig fyrir ágúst 2013.