Könnun sýnir nægt framboð af starfsfólki á landinu

Nægt framboð er af starfsfólki um þessar mundir til að sinna eftirspurn fyrirtækja. Yfirgnæfandi meirihluti stjórnenda í atvinnulífinu telur að ekki sé skortur á starfsfólki. Einungis 13% stjórnenda finna fyrir skorti á starfsfólki en 87% ekki.

Fjallað er um málið á vefsíðu Samtaka atvinnulífsins en þetta er ein af niðurstöðum könnunar á stöðu og framtíðarhorfum stærstu fyrirtækja landsins, sem gerð var í síðasta mánuði fyrir Samtök atvinnulífsins og Seðlabankann. Þetta er svipuð niðurstaða og í sambærilegri könnun fyrir ári síðan, þegar 14% stjórnenda fundu fyrir skorti á starfsfólki.

Staðan er þó mjög mismunandi eftir atvinnugreinum. Skortur á starfsfólki virðist mjög mikill í byggingariðnaði þar sem tæplega 60% stjórnenda finna fyrir skorti á starfsfólki. Skortur er einnig töluverður í ferðaþjónustu, flutningum og ýmissi þjónustu þar sem um 20% stjórnenda finna fyrir skorti. Enginn skortur er hins vegar á starfsfólki í verslun og fjármálaþjónustu.

Skorturinn er minnstur í stærstu fyrirtækjunum en tilfinnanlegur í minni og meðalstórum fyrirtækjum, nánar tiltekið þeirra sem hafa færri en 60 starfsmenn og ársveltu undir einum milljarði króna.

Skortur á starfsfólki er heldur meiri á landsbyggðinni en á höfuðborgarsvæðinu. Á landsbyggðinni finna 16% stjórnenda fyrir skorti en 12% á höfuðborgarsvæðinu.

Um 20% stjórnenda sjá fram á fjölgun starfsmanna á næstu sex mánuðum, 10% vænta fækkunar og 70% að starfsmannafjöldi verði óbreyttur. Mestrar fjölgunar er vænst í byggingariðnaði og ferða- og flutningaþjónustu.