Deloitte hlýtur jafnlaunavottun VR

Deloitte er sjöunda fyrirtækið til að hljóta jafnlaunavottun VR.  Með jafnlaunavottuninni hefur Deloitte fengið staðfestingu á því að búið sé að kerfisbinda launaákvarðanir og að Deloitte sé með jafnlaunakerfi samkvæmt kröfum ÍST 85.

Í tilkynningu segir að Deloitte mun nú sem áður tryggja að starfsfólk sem vinnur sömu eða jafnverðmæt störf sé ekki mismunað í launum, en jafnlaunastefna hefur verið við lýði síðan 1999 hjá Deloitte.

Þorvarður Gunnarsson tók í dag við vottunarskírteininu frá VR að viðstöddum starfsmönnum Deloitte sem voru þar samankomnir til að fagna þessum merka áfanga.  „Það er okkur mikill heiður að hljóta jafnlaunavottun VR, en með því erum við að fá þriðja aðila til að votta það sem við höfum vitað lengi, þ.e. að hjá Deloitte fyrirfinnst enginn kynbundinn launamunur,“ segir Þorvarður Gunnarsson, forstjóri Deloitte í tilkynningunni.

„Það er mér ánægjulegt að sjá að Deloitte sé komið í hóp fyrirtækja sem sýna svart á hvítu að launastefna fyrirtækisins og mannauðsstjórnun þess mismuni ekki körlum og konum. Vottunin er til marks um að fyrirtækið vilji axla samfélagslega ábyrgð og skipa sér flokk fyrirtækja og stofnana sem meta starfsmenn sína að verðleikum“ segir Árni Leósson, sviðsstjóri Þróunarsviðs VR.