Viðskiptajöfnuðurinn hagstæður um 5,6 milljarða

Viðskiptajöfnuður mældist hagstæður um 5,6 milljarða kr. í ársfjórðungnum samanborið við rúmlega 15  milljarða kr. óhagstæðan jöfnuð fjórðunginn á undan. Afgangur af vöruskiptum við útlönd var 25,6 milljarða kr. og 0,6 milljarða kr. af þjónustuviðskiptum.

Þetta kemur fram á vefsíðu Seðlabankans. Þar segir að jöfnuður þáttatekna var hinsvegar neikvæður um 20,7 milljarða kr. Viðskiptajöfnuður án áhrifa innlánsstofnana í slitameðferð var hagstæður um 14,4 milljarða kr. samanborið við óhagstæðan um 4 milljarða kr. fjórðunginn á undan.

Halli á þáttatekjum er eins og áður að miklu leyti vegna innlánsstofnana í slitameðferð. Reiknuð gjöld vegna þeirra námu 14,2 milljarða kr. og tekjur um 5,3 milljarða kr. Neikvæð áhrif innlánsstofnana í slitameðferð á þáttatekjujöfnuð nema 8,9 milljörðum kr. Jöfnuður þáttatekna án áhrifa þeirra er því óhagstæður um 11,9 milljarða kr.

Erlendar eignir þjóðarbúsins námu 4.597 milljörðum kr. í lok ársfjórðungsins en skuldir 12.846 milljarða kr. Hrein staða við útlönd var því neikvæð um 8.249 milljarða kr. og hækka nettóskuldir um 31 milljarðkr. á milli ársfjórðunga. Að frátöldum innlánsstofnunum í slitameðferð námu eignir þjóðarbúsins 2.617 milljörðum kr. og skuldir 3.071 milljarð kr. og var hrein staða því neikvæð um 453 milljarða kr. og lækka nettóskuldir um 37 milljarða kr. á milli ársfjórðunga. Sjá nánar hér.