Oxymap selur súrefnismæli til Sviss

Nýsköpunarfyrirtækið Oxymap er búið er að selja súrefnismæli sinn í fjórum heimsálfum en í júní verður fimmtánda tækið afgreitt til Sviss.

Oxymap framleiðir súrefnismæli sem mælir súrefnismettun og æðavídd í augnbotni. Tækið er notað til rannsókna á augnsjúkdómum víða um heim, að því er segir á vefsíðu Samtaka atvinnulífsins en þar er fjallað um fyrirtækið undir formerkinu Jákvæð frétt.

Árni Þór Árnason, stjórnarformaður Oxymap segir verðmæti mælisins og tilheyrandi búnaðar vera um 12,4 milljónir íslenskra króna.

„Íhlutir eru aðkeyptir en hugbúnaðurinn sem við notum er þróaður á Íslandi," segir Árni. Í dag starfa átta manns hjá Oxymap en fyrirtækið var stofnað í Reykjavík árið 2002.