Merking og Format-Akron sameinast

Merking í Reykjavík og Format-Akron í Hafnarfirði sameinuðust um síðustu mánaðarmót.

Í tilkynningu segir að hið sameinaða félag verði fyrst um sinn rekið á báðum stöðum en frá og með 15. september 2013 verður öll starfsemin að Viðarhöfða 4 í Reykjavík undir nafni Merkingar.

Eigendur bæði Merkingar og Format-Akron eiga hið sameinaða félag, sem ætla má að velti um hálfum milljarði króna á ári. Pétur Björnsson verður stjórnarformaður Merkingar eftir sameiningu en Pétur Ingi Arnarson verður framkvæmdastjóri.

Merking rekur skilta- og auglýsingasmiðju og er með 26 manns á launaskrá.

Format-Akron sérhæfir sig í hönnun og vinnslu eininga úr plexígleri. Hjá fyrirtækinu starfa 11 manns.