Vöruskiptin hagstæð um 30,5 milljarða á fyrstu mánuðum ársins

Fyrstu fjóra mánuðina í ár voru fluttar út vörur fyrir 207,8 milljarða króna en inn fyrir 177,3 milljarða króna. 30,5 milljarða króna afgangur var því á vöruskiptum við útlönd en á sama tíma árið áður voru þau hagstæð um 27,7 milljarða kr. á gengi hvors árs. Vöruskiptajöfnuðurinn var því 2,8 milljörðum króna hagstæðari en á sama tíma árið áður.

Þetta kemur fram á vefsíðu Hagstofunnar. Þar segir að í aprílmánuði voru fluttar út vörur fyrir 51,5 milljarð króna og inn fyrir tæpa 46,7 milljarða kr. Vöruskiptin í apríl voru því hagstæð um 4,9 milljarða króna. Í apríl í fyrra voru vöruskiptin hagstæð um 9,2 milljarða króna á gengi hvors árs.

Fyrstu fjóra mánuði ársins var verðmæti vöruútflutnings 1,2 milljörðum eða 0,6% meira á gengi hvors árs en á sama tíma árið áður. Iðnaðarvörur voru 52,1% alls útflutnings og var verðmæti þeirra 2,1% minna en á sama tíma árið áður. Sjávarafurðir voru 44% alls útflutnings og var verðmæti þeirra 5,5% meira en á sama tíma árið áður.

Fyrstu fjóra mánuði ársins var verðmæti vöruinnflutnings 1,6 milljörðum eða 0,9% minna á gengi hvors árs en á sama tíma árið áður, aðallega vegna minni innflutnings á skipum og flugvélum. Einnig minnkaði innflutningur á  hrá- og rekstrarvörum en á móti kom aukinn innflutningur fjárfestingavara, annarra neysluvara og á mat og drykkjarvöru.