Hagstofan mælir 6,6% atvinnuleysi í apríl

Samkvæmt Vinnumarkaðsrannsókn Hagstofu Íslands voru í apríl 2013 að jafnaði 186.800 manns á vinnumarkaði. Af þeim voru 174.400 starfandi og 12.300 án vinnu og í atvinnuleit. Atvinnuþátttaka mældist 82,3%, hlutfall starfandi 76,9% og atvinnuleysi var 6,6%.

Á vefsíðu Hagstofunnar segir að atvinnuleysi var einu prósentustigi lægra en í apríl 2012 en þá var atvinnuleysi 7,6%. Atvinnuleysi í apríl 2013 var 7,1% á meðal karla miðað við 8,2% í apríl 2012 og meðal kvenna var það 6% miðað við 7% í apríl 2012.

Árstíðaleiðréttur fjöldi fólks á vinnumarkaði í apríl 2013 var 185.200 eða 82% atvinnuþátttaka en var 184.400 í mars 2013 eða 80,8%. Fjöldi atvinnulausra í apríl 2013 var 10.700 eða 5,8% en var 11.700 eða 6,3% í mars 2013.

Fjöldi starfandi í apríl 2013 var 174.500 eða 77,3% en var 172.700 eða 75,6% í mars 2013. Samkvæmt árstíðaleiðréttingu minnkaði atvinnuleysi því um 0,6 prósentustig á milli mánaða og hlutfall starfandi jókst um 1,6 prósentustig.

Leitni árstíðaleiðréttingar á vinnuaflstölum sýnir að síðastliðna sex mánuði hefur fólki á vinnumarkaði fjölgað um 2,2% og atvinnuþátttaka því aukist um 0,8 prósentustig. Atvinnulausum fjölgaði um 1,2% en hlutfall atvinnulausra minnkaði hins vegar um 0,1 prósentustig.

Starfandi fólki fjölgaði á þessu tímabili um 2,3% og hlutfallið jókst um 0,8 prósentustig. Þegar litið er á þróun leitni síðustu 12 mánaða hefur fólki á vinnumarkaði fjölgað um 1,4%, atvinnulausum fækkað um 9,7% og fjöldi starfandi aukist um 3,3%.