Erlendir ferðamenn sækja í íslensk sumarhús

Mikil aukning hefur orðið á bókunum sumarhúsa hjá erlendum ferðamönnum.  60% viðskiptavina sprotafyrirtækisins Búngaló, sem aðstoðar íslenskar fjölskyldur við að leigja út sumarhús sín, eru erlendir. 

Í tilkynningu segir að Árið 2010 þegar vefsíða Búngaló fór í loftið voru viðskiptavinirnir nær eingöngu íslenskir.

„Erlendir ferðamenn eru áhugasamir um að gista í íslenskum sumarhúsum og kynnast þannig íslenskri náttúru og menningu,“ segir Haukur Guðjónsson, stofnandi Búngaló í tilkynningunni.

Búngaló hefur nú slegið eigið sölumet fjóra mánuði í röð og stefnir í fimmta sölumetið í maí. Salan hefur aukist að meðaltali um 13% í hverjum mánuði og hefur meira en þrefaldast frá sama tímabili í fyrra.

„Mikill áhugi er á að taka sumarhús til leigu í skemmri tíma. Það skapar tækifæri fyrir sumarhúsaeigendur til að leigja þau út þegar fjölskyldur þeirra eru ekki að njóta sveitasælunnar. Þannig má afla auka tekna sem getur komið sér vel, til að mynda við að mæta útgjöldum vegna sumarhússins.  Útleigan hefur gengið vel og fólk hefur gengið snyrtilega um sumarhúsin,“ segir Haukur.