Væntingavísitalan yfir 100 stig í fyrsta sinn síðan 2008

Væntingavísitala Gallup tók heldur betur við sér í maímánuði og fer nú í fyrsta sinn yfir 100 stig frá því í febrúar árið 2008.

Þetta kemur fram í Morgunkorni greiningar Íslandsbanka. Þar segir að íslenskir neytendur geti þar með þar með talist bjartsýnir á efnahags- og atvinnulíf þjóðarinnar í fyrsta skiptið frá þeim tíma, en þegar vísitalan er yfir 100 stigum eru fleiri neytendur bjartsýnir en svartsýnir. Þannig hækkaði Væntingavísitalan um rúm 14 stig á milli apríl og maí, og mælist vísitalan nú 101 stig.

Í fréttatilkynningu Capacent er tekið fram að mælingin hafi verið framkvæmd á tímabilinu 2. - 8. maí, sem var eftir alþingiskosningar en fyrir myndun nýrrar ríkisstjórnar. Líklegt er að væntingavísitalan sé talsvert lituð af niðurstöðu alþingiskosninga, og samkvæmt henni virðast Íslendingar almennt vera ánægðir með þá útkomu.

Þess má þó geta að fyrir hrun hækkaði vísitalan að jafnaði talsvert meira á milli apríl og maí á kosningaárum en á öðrum árum, og virðast Íslendingar þar með fyllast almennt af aukinni bjartsýni þegar ný ríkistjórn tekur við völdum. Þó var kosningaárið 2009 undantekning frá þessu, enda var kreppan á þeim tíma að grafa sig dýpra og dýpra inn í hagkerfið.

Íslendingar sjaldan verið bjartsýnni



Allar undirvísitölur hækka í maí frá fyrri mánuði. Mestu munar um hækkun á væntingum neytenda til aðstæðna eftir 6 mánuði, og virðast heimilin því búast við verulegri breytingu til batnaðar strax á hveitibrauðsdögum nýrrar ríkisstjórnar. Hækkar sú vísitala um tæp 19 stig á framangreindu tímabili, og mælist nú 142,3 stig. Hefur hún í raun aðeins 6 sinnum áður mælst hærri frá því farið var að mæla væntingavísitöluna í mars 2001, eða í rétt rúmlega 4% tilvika. Sjá nánar hér.