Staða ríkissjóðs batnar á milli ára

Greiðsluuppgjör ríkissjóðs fyrir fyrstu fjóra mánuði ársins  liggur nú fyrir. Staða handbærs fjár frá rekstri batnaði miðað við sama tímabil í fyrra og var neikvætt um 4,3 milljarða kr. en var neikvætt um 6,1 milljarð kr. í fyrra.

Á vefsíðu fjármálaráðuneytisins segir að tekjur hækkuðu um 7,1 milljarða kr. milli ára en gjöld jukust um 5,6 milljarða kr. Þessi útkoma er betri en áætlað var þar sem gert var ráð fyrir að handbært fé yrði neikvætt um 6,3 milljarða kr. sem skýrist að mestu með því að dreifing útgjalda innan ársins reyndist önnur en gert hafði verið ráð fyrir.

Innheimtar tekjur ríkissjóðs námu 174,6 milljörðum kr. á fyrstu fjórum mánuðum ársins sem er 4,2% aukning á milli ára. Niðurstaða tímabilsins er 0,6 milljörðum kr. eða 0,3% undir tekjuáætlun fjárlaga. Í grófum dráttum teljast tekjur ársins því á áætlun og ljóst er að það neikvæða frávik sem kom fram í greiðsluafkomu fyrsta ársfjórðungs hefur að mestu gengið til baka. Sjá nánar hér.