Vilja kæra brot stjórnenda Valitors til lögreglu

Kortaþjónustan hefur sent áskorun til Samkeppniseftirlitsins um að kæra samkeppnislagabrot stjórnenda Valitors til lögreglu.

Í tilkynningu segir að um leið séu stjórnvöld hvött til að tryggja Samkeppniseftirlitinu auknar heimildir þannig að eftirlitið geti ekki aðeins vísað málum til lögreglu eins og nú er heimilt heldur einnig til annarra opinberra eftirlitsaðila, t.d. til Fjármálaeftirlits og skattayfirvalda, svo lög um fjármálafyrirtæki virki sem skyldi.

Í áskoruninni segir m.a.: „Í ljósi ákvörðunar Samkeppniseftirlitsins nr. 08/2013 þar sem eftirlitið lagði 500 milljóna króna sekt á Valitor vegna alvarlegra, langvarandi og síendurtekinna brota Valitor gegn samkeppnislögum skorar Kortaþjónustan á Samkeppniseftirlitið að nýta heimildir samkeppnislaga og kæra málið til lögreglu til rannsóknar. Í ákvörðuninni kemur fram að brotin hafi verið mjög alvarleg og að þau varði mikilvæga markaði, bæði fyrir neytendur og atvinnulífið. Jafnframt sé með þeim brotið gegn skilyrðum sem Valitor undirgekkst í sátt við Samkeppniseftirlitið árið 2007, eftir að hafa þá viðurkennt brot sín. Það eitt bendir til einbeitts brotavilja.

Augljóst má því vera að þau úrræði sem Samkeppniseftirlitið hefur lögum samkvæmt til að leggja sektir á brotleg fyrirtæki eða ljúka málum með sátt duga einfaldlega ekki til að stöðva Valitor í því að brjóta ítrekað gegn samkeppnislögum. Þess vegna hvetur Kortaþjónustan, sem fyrr segir, Samkeppniseftirlitið til að vísa málinu til lögregluyfirvalda til rannsóknar.“

Jafnframt er vísað til laga um fjármálafyrirtæki og krafna um hæfi stjórnarmanna og framkvæmdastjóra. Kortaþjónustan vill með lögreglurannsókn m.a. fá úr því skorið hvort stjórnarmenn og framkvæmdastjóri Valitor fullnægi hæfisskilyrðum laga um fjármálafyrirtæki. Þá er vísað til þess að bankastjóri Arion banka var framkvæmdastjóri Valitor á þeim tíma sem umrædd brot voru framin og bent á að nauðsynlegt sé að bæði lögreglan og Fjármálaeftirlitið rannsaki sérstaklega hæfi hans til að gegna þeirri stöðu.

Þá segir einnig í áskoruninni að Kortaþjónustan hafi nú verið starfandi í rétt rúm tíu ár. Á þeim tíma hafa félög í samkeppni við Kortaþjónustuna samtals greitt 1.235 milljónir króna í sektir til Samkeppniseftirlitsins vegna brota gegn fyrirtækinu og enn fleiri mál eru í rannsókn.

„Kortaþjónustan telur einsýnt að úrræði Samkeppniseftirlitsins hafi hingað til ekki dugað og því verði stofnunin að leita leiða til að draga stjórnendur til ábyrgðar fyrir gjörðir sínar. Fjársektir á fyrirtækjakennitölur virðast einfaldlega ekki duga til að koma á heiðarlegri samkeppni á kortamarkaðnum,“ segir í áskoruninni.