Kröfuhafar samþykkja endurskipulagningu Skipta

Kröfuhafar Skipta hf. hafa samþykkt fjárhagslega endurskipulagningu félagsins. Hún felur m.a. í sér lán frá Arion banka upp á 19 milljarða kr.

Í tilkynningu til Kauphallarinnar segir að fram kom í tilkynningu Skipta hf. dags. 2. apríl 2013 að fyrir lægi tillaga um endurskipulagningu skulda félagsins. Samkvæmt tilkynningunni voru meginatriði tillögunnar svohljóðandi:

Í fyrsta lagi, endurgreiðir Skipti hf. hverjum og einum kröfuhafa (miðað við skráða kröfuhafa kl. 16:30 þann 27.mars 2013) tvær milljónir kr. í reiðufé og kemur greiðslan til lækkunar höfuðstóls viðkomandi kröfu.

Í öðru lagi að öllum kröfum samkvæmt skuldabréfunum sem skráð eru í kauphöll undir heiti SIMI 06 01 verði breytt eða skipt fyrir hlutafé í Skiptum hf.

Í þriðja lagi að öllum kröfum Arion banka hf. sem ekki eru hluti af núverandi forgangsláni félagsins, verði breytt eða skipt fyrir hlutafé í Skiptum.

Í fjórða lagi felur tillagan í sér að forgangslán félagsins verði endurfjármagnað að fullu með annars vegar láni frá Arion banka hf. að fjárhæð um kr. 19 milljarðar og hins vegar

með útgáfu skuldabréfaflokks að fjárhæð um kr. 8 milljarðar, eða annarri fjármögnun. Er gert ráð fyrir að framangreindar lánveitingar verði tryggðar með fyrsta veðrétti í helstu eignum Skipta hf. og dótturfélögum þess.

Helsta skilyrði tillögu félagsins um endurskipulagningu skulda félagsins er að Arion banki hf. og allir eigendur skuldabréfaflokksins SIMI 06 01 gerist aðilar að samningi um endurskipulagninguna eigi síðar en þann 30. apríl 2013.

Í kjölfar jákvæðra samskipta við Arion banka hf. og eigendur skuldabréfaflokksins SIMI 06 01 er hér með tilkynnt um að framangreindir aðilar hafa samþykkt að gerast aðilar að samningi um endurskipulagninguna. Þá liggur fyrir lánsloforð til að endurfjármagna forgangslán félagsins.

„Með þessu samkomulagi er mjög stórum áfanga náð í endurskipulagningu fjárhags Skipta hf. og hefur félagið nú 2 mánuði til að ganga formlega frá öllum málum því tengt.  Skipti hf. geta því horft björtum augum fram á við og haldið áfram öflugri uppbyggingu á fjarskiptainnviðum og fjarskiptakerfum,“ segir Steinn Logi Björnsson, forstjóri Skipta í tilkynningunni.