Stærsta afborgun í sögu Orkuveitunnar

Orkuveita Reykjavíkur fékk í fyrsta sinn frá bankahruni tæplega þriggja milljarða króna lán frá erlendum banka. Forstjórinn segir þessi tíðindi til marks um að endurskipulagning fyrirtækisins sé á réttri leið og bjartari tímar framundan.

Rekstur Orkuveitunnar hefur verið í endurskipulagningu frá því seinnihluta árs 2010 og var gerð rekstraráætlun frá mars 2011 til 2016.  Rekstur Orkuveitunnar hefur verið þungur frá hruni og var viðbúið að þetta ár yrði það þyngsta í afborgunum. Skuldir orkuveitunnar nema nú um 215 milljörðum króna og verða afborganir fyrirtækisins um 25 milljarðar á þessu ári. Nú eru hins vegar bjartari tímari framundan að sögn Bjarna Bjarnasonar forstjórans, þar sem fyrirtækinu tókst í dag að greiða háa lánaafborgun til belgíska franska bankans Dexia Credit Local.

„Í dag vorum við að greiða af erlendu láni um tíu milljarða í einni afborgun. Og þetta er langstærsta staka afborgun af lánum sem við sjáum fyrir. Árið 2013 er langerfiðasta greiðslulánið í áætlun okkar til 2016. Við sjáum núna að við komumst klakklaust í gegnum það og eftir það er mun léttara framundan."     

En það urðu einnig vatnaskil í rekstri Orkuveitunnar í dag þar sem fyrirtækið fékk í fyrsta skipti frá hruni lán frá erlendum banka. 

„Það er til marks um það að bankarnir hafa núna trú á rekstri Orkuveitunnar. Það er búið að fara mjög ítarlega í saumana á öllum rekstri hér þessi banki gerði það til að kanna stöðu okkar og framtíðarhorfur.  Þeir lána okkur tæpa þrjá milljarða í erlendum gjaldmiðli án þess að krefjast ábyrgðar eiganda á láninu. Þeir taka sem sagt okkar rekstur sem tryggingu fyrir endurgreiðslu."

Ekki má greina  frá því strax hvaða erlendi banki þetta er en samkvæmt heimildum fréttastofu er það Goldman Sachs.  Bjarni segir tvær ástæður fyrir lántökunni.

„Við viljum sýna fram á að við getum það að við njótum þess trausts sem til þarf og hins vegar erum við að styrkja lausafjárstöðu. Við eigum ekki nógu mikið laust fé, það væri æskilegt að hafa það hærra. Við ætlum ekki að eyða láninu það er mikilvægt, heldur eiga aðeins betri sjóð til að mæta sveiflum og öðrum minniháttar áföllum í rekstri," segir Bjarni.