Tvær fjölskyldur fá tæpar 300 milljónir í arðgreiðslur

Tvær fjölskyldur fá greiddar tæpar þrjú hundruð milljónir króna í arðgreiðslur af sautján hundruð milljón króna arði sem greiddur verður til hluthafa HB Granda.  Þetta er tæplega fimmtungur af heildararðgreiðslum félagsins.

Á síðasta aðalfundi HB Granda sem fór fram síðastliðinn föstudag var samþykkt að greiða arð til hluthafa félagsins  upp á tæpar sautján hundruð milljónir króna. Hagnaður félagsins nam 2,4 milljörðum árið 2012 og eru arðgreiðslurnar þær hæstu sem greiddar hafa verið hjá félaginu frá hruni. 

Félagið Vogun er stærsti hluthafinn í HB Granda með um 40 % eignarhlut. Arion banki er næststærsti hluthafinn í HB Granda með rúm 33 % en sá hlutur var áður í eigu Kjalar hf, félags í eigu Ólafs Ólafssonar. 

Eignarhald Vogunar er tiltölulega flókið. Vogun er 100 % í eigu Hvals Hf sem samanstendur af tæplega hundrað aðilum. Stærsti eigandi Hvals er Fiskveiðihlutafélagið Venus sem er með 36% eignarhlut.

Venus er að mestu í eigu Kristjáns og Birnu Loftsbarna sem eiga 21 % hlut hvort og svo annars vegar Kristínar, Sigríðar og  Árna Vilhjálmsbarna sem eiga 12 % hlut hvert. Árni Vilhjálmsson fyrrverandi stjórnarformaður HB Granda lést hins vegar nýlega og fer dánarbú Árna með hans hlut. 

Félögin Venus og Vogun eiga saman meirihluta í Hampiðjunni sem á svo 9,4 % í HB Granda.

Arðgreiðslur HB Granda til þessara tveggja fjölskyldna nema  tæpum þrjú hundruð milljónum króna, eða tæpum sautján prósentum af heildararðgreiðslum félagsins.

Systkinin Kristján og Birna Loftsbörn fá því tæplega hundrað og fimmtíu milljónir króna í arð  eða rúmar 73 milljónir hvort.

Systurnar Kristín og Sigríður Vilhjálmsdætur og dánarbú Árna Vilhjálmssonar fá því samtals um hundrað og þrjátíu milljónir greiddar í arð eða tæplega fjörutíu og fjórar milljónir hvert.

Í fyrra greiddi HB Grandi tæpar sjö hundruð milljónir í arð til eigenda sinna fyrir rekstarárið 2011. Arðgreiðslur félagsins jukust um einn milljarð milli ára og eru því samtals orðnar rúmir 2,3 milljarðar á tveimur árum.