Hagstofan mældi 6,8% atvinnuleysi í mars

Atvinnuleysið mældist 6,8% í mars s.l. og lækkaði um 0,7 prósentur miðað við sama mánuð í fyrra. Þetta kemur fram í vinnumarkaðsrannsókn Hagstofunnar.

Í mars voru  að jafnaði 179.400 manns á vinnumarkaði. Af þeim voru 167.100 starfandi og 12.300 án vinnu og í atvinnuleit. Atvinnuþátttaka mældist 79,3%, hlutfall starfandi 73,9% og atvinnuleysi var 6,8%. Atvinnuleysi var 0,7 prósentustigum lægra en í mars 2012 en þá var atvinnuleysi 7,5%.

Á vefsíðu Hagstofunnar segir að atvinnuleysi í mars 2013 var 7,4% á meðal karla miðað við 9% í mars 2012 og meðal kvenna var það 6,2% miðað við 5,9% í mars 2012.

Árstíðaleiðréttur fjöldi fólks á vinnumarkaði í mars 2013 var 183.700 eða 80,6% atvinnuþátttaka en var 181.900 í febrúar 2013 eða 80,4%. Fjöldi atvinnulausra í mars 2013 var 11.700 eða 6,4% en var 8.500 eða 4,7% í febrúar 2013. Fjöldi starfandi í mars 2013 var 171.900 eða 75,5% en var 173.400 eða 76,7% í febrúar 2013.

Samkvæmt árstíðaleiðréttingu jókst atvinnuleysi því um 1,7 prósentustig á milli mánaða og hlutfall starfandi minnkaði um 1,2 prósentustig.