Fundar með Húsavíkurpresti síðdegis - ætlar að útskýra aðkomu presta í ofbeldismálum

Solveig Lára Guðmundsdóttir, vígslubiskup á Hólum, hefur birt verkferla sem hún hyggst skýra fyrir sóknarpresti á Húsavík og sóknarnefndinni.

Um er að ræða fund sem Agnes M. Sigurðardóttir biskup fól Solveigu Láru að hafa umsjón með, en fundurinn er með Sighvati Karlssyni, sóknarpresti á Húsavík, og sóknarnefnd kirkjunnar, vegna viðbragða prestsins í nauðgunarmáli Guðnýju Jónu Kristjánsdóttur, sem greindi frá því í Kastljósi á dögunum að Sighvatur hefði hvatt hana til þess að kæra ekki nauðgunina sem hún varð fyrir, heldur sættast við brotamanninn.

Um er að ræða sjö atriði í því sem Solveig Lára kallar verkferli í Húsavíkurmálinu. Fyrsta atriðið er til að mynda: „Það á aldrei að vera hlutverk presta að vera neins konar sáttargjörðaraðili milli þolenda og gerenda í ofbeldismálum."

Sjálf segir Solveig Lára að á fundinum muni hún skýra út hvernig aðkoma presta á að vera þegar skjólstæðingar hafa orðið fyrir ofbeldi.

Eins og lesendum er eflaust kunnugt um þá skrifuðu 113 íbúar Húsavíkur nöfn sín á sérstakan stuðningslista til handa dæmdum nauðgara og fjölskyldu hans. Hart var sótt að Guðnýju Jónu sem hrökklaðist að lokum úr bænum, en í dag starfar hún sem læknir í Noregi.

Hæstiréttur dæmdi manninn, sem var sautján ára gamall þegar hann framdi brotið, í fimmtán mánaða skilorðsbundið fangelsi, en Guðnýju voru dæmdar hærri bætur vegna þess sem var kallað félagsleg röskun sem hún hafði orðið fyrir vegna málsins.

Fundurinn fer fram síðdegis. Hægt er að lesa verkferla Solveigar Láru á bloggsíðu hennar, sem er hér.