Ræddi við Kínverja um samstarf um olíuleit

Össur Skarphéðinsson utanríkisráðherra hvatti um helgina kínversk stjórnvöld til samstarfs um olíuverkefni á Drekasvæðinu en íslenskt fyrirtæki sem stofnað hefur verið í þeim tilgangi hefur óskað eftir samvinnu við kínverska fyrirtækið Sinopec um það. Össur og Jóhanna Sigurðardóttir forsætisráðherra eru saman komin í Kína til þess að undirrita fríverslunarsamning. Utanríkisráðherrar landanna munu undirrita samninginn að viðstöddum forsætisráðherrum.

Kínversk stjórnvöld fögnuðu sömuleiðis þeim tækifærum sem geti skapast í samskiptum ríkjanna við auknar siglingar yfir norðurpólinn. Í fréttatilkynningu frá íslenska utanríkisráðuneytinu segir að Kínverjar og Íslendingar hafi verið sammála um að Miðleiðin svokallaða sé hentugasta skipaleiðin milli Asíu og Evrópu í framtíðinni. Umskipunarhöfn á Íslandi gæti þá orðið ein af mikilvægum áfangastöðum á þeirri leið. Viðskiptaráðherra Kína hvatti til þess að íslensk og kínversk stjórnvöld þróuðu það samstarf áfram.

Samstarf um nýtingu jarðhita

Össur og Gao Hucheng, utanríkisviðskiptaráðherra Kína, ræddu áform Kínverja um áframhaldandi jarðhitavæðingu Kínverja í samvinnu við íslensk fyrirtæki og íslenska sérfræðinga, en stærsta hitaveita í heimi er nú í Kína, byggð á grundvelli íslenskrar sérþekkingar. Á nýafstöðnu flokksþingi samþykkti kinverska ríkisstjórnin sérstakt átak í jarðhitanýtingu, en áætlað er að 400 borgir gætu sett upp jarðhitaveitur að íslenskum hætti. Í tengslum við fríverslunarsamninginn verður undirritaður samningur um frekari fjármögnun á næstu stórverkefnum í samstarfi Íslendinga og Kínverja á þessu sviði.

Einnig kom fram af hálfu kínverska ráðherrans að Kínverjar væru mjög jákvæðir gagnvart samstarfi við Íslendinga um nýtingu jarðhita í öðrum löndum, til dæmis í Afríku. Þar gætu skapast fjölmörg störf fyrir íslenska sérfræðinga á ýmsum sviðum við kortlagningu linda og byggingu jarðorkuvera.

Ráðherrarnir ræddu jafnframt framvindu samstarfs þjóðanna á sviði orkusparandi aðgerða, en samningar sem gerðir verða í tengslum við fríverslunarsamninginn varða meðal annars stórfellt samstarf Marorku, sem framleiðir orkusparandi tækni fyrir skip, við stóra aðila sem framleiða vélar í kínverska kaupskipaflotann.

Kínverski ráðherrann sagðist myndu hvetja kínversk fyrirtæki til að taka þátt í uppbyggingarverkefnum á Íslandi, svo sem um olíuvinnslu, einstaka framkvæmdir og kísilflöguverksmiðju á Grundartanga.