FME varar við skuldsettum hlutabréfakaupum

Í kjölfar fréttar um vaxandi ásókn fjárfesta í skuldsett hlutabréfakaup sem birtist í Morgunblaðinu þann 16. apríl vill Fjármálaeftirlitið (FME) vekja sérstaka athygli almennra fjárfesta á þeirri áhættu sem fylgir slíkum viðskiptum. 

Þetta kemur fram á vefsíðu FME. Þar segir að skuldsett hlutabréfakaup þar sem fjárfestir leggur einungis fram hluta kaupverðsins eru í eðli sínu mjög áhættusöm og til þess fallin að auka sveiflur í ávöxtun, hvort sem er til hagnaðar eða taps. Fjárfestingin getur á endanum kostað fjárfesta fjármuni sem þeir hafa ekki efni á að tapa. 

Ennfremur vill Fjármálaeftirlitið benda á að fjármagnshöft og það fjárfestingarumhverfi sem nú ríkir á Íslandi veitir enga vissu um jákvæða ávöxtun hlutabréfa. Öllum fjárfestingum, þar með talið fjárfestingum í hlutabréfum, fylgir áhætta og fjárfestar eiga ávallt á hættu að tapa fjármunum sínum að hluta til eða að fullu.