Stefna á að byggja 95 íbúðir í Brautarholti

Ríkisstjórnin samþykkti á fundi í morgun tillögu Guðbjarts Hannessonar velferðarráðherra sem heimilar Íbúðalánasjóði að veita Félagsstofnun stúdenta 90% lán með 3,5% vöxtum til að byggja 95 íbúðir í Brautarholti 7 í Reykjavík.

Áætlaður byggingarkostnaður er 1.400 milljónir króna og nemur lán Íbúðalánasjóðs því 1.260 milljónum króna. Ríkissjóður niðurgreiðir lánið sem nemur mismuninum á 3,5% vöxtum og almennum útlánsvöxtum sjóðsins.

Nærri 300 nýjar íbúðir í notkun á þessu ári

Árið 2011 var sambærileg heimild veitt sem gerði Félagsstofnun stúdenta kleift að byggja hátt í 300 íbúðir í Vatnsmýrinni fyrir einstaklinga og pör og var áætlaður heildarkostnaður við þær framkvæmdir um fjórir milljarðar króna.

Í tilkynningu frá velferðarráðuneytinu segir að þessar íbúðir verði allar teknar í notkun fyrir lok þessa árs en fyrir á Félagsstofnun stúdenta samtals 815 herbergi; einstaklings-, par- og fjölskylduíbúðir til útleigu.