Lærði að meta lífið - neitar að gefast upp

Snorri Þór Guðmundsson 41 árs stýrimaður á Vestmannaey VE 444 reynir nú allt hvað hann getur til að láta draum sinn rætast sem er að taka þátt í siglingaskútukeppni í kringum heiminn sem ber heitið Clipper Round The World Yacht Race.

"Þetta er keppni þar sem venjulegt fólk stígur út úr sínu venjulega umhverfi og tekur þátt í einni erfiðustu siglingakeppni sem stendur yfir í ellefu mánuði. Það er siglt í kringum hnöttinn og fólk allsstaðar úr heiminum sækir um að fá sæti um borð í skútunum sem eru allar eins. Keppnin er hugarfóstur siglingakappans Sir Robin Knox sem fyrstur manna sigldi einn án þess að stoppa hringinn í kringum jörðina," útskýrir Snorri.

Bjargaði félaga sínum frá drukknun

Snorri hefur varið mörgum árum á sjó en árið 1991 bjargaði hann félaga sínum Jóhanni Jónssyni frá drukknun. Þá var Snorri annar stýrimaður á Sjávarborginni GK þegar Jóhann féll útbyrðis en þá var skipið á veiðum á Dohrnbanka. Þetta mikla björgunarafrek vakti verðskuldaða athygli um land allt á þeim tíma.

"Ég var ungur og nýútskrifaður úr Stýrimannaskólanum í Eyjum en ég kem frá Þingeyri við Dýrafjörð. Ég framkvæmdi þarna það sem ég hafði lært en áttaði mig ekki fyrr en eftir á hvað ég hafði gert. Ég lærði að meta lífið meir og eftir að hafa fylgst með félaga mínum lifa af í hálftíma í sjó sem var -0,1 gráða sá ég að maður á aldrei að gefast upp. Ég átti líka heima á Flateyri þegar flóðin féllu og þá var það sama upp á teningnum að gefast ekki upp," segir Snorri spurður út í björgunina og hvernig hún hefur breytt viðhorfum hans til lífsins.

"Maðurinn sem ég bjargaði launaði mér svo lífsgjöfina með því að skíra son sinn eftir mér. Hann heitir Jón Snorri Jóhannsson."

Ákvað að láta slag standa og elta drauminn

"Að eiga möguleika að taka þátt í einum legg þessara miklu keppni er ævintýri og draumur. Ég sá auglýsingu um þessa keppni eina nótt fyrir nokkrum dögum. Þar stóð að í boði væri sæti í einum erfiðasta leggnum frá S-Afríku til Ástralíu þá lét ég slag standa og setti inn umsókn," segir Snorri.

Hér erlinkurá legginn (leiðin sem Snorri er að sækja um að fá að sigla).

Mikil áskorun að sigla í einu erfiðasta siglingaumhverfi í heimi

Er þetta ekki rándýrt? "Auðvitað fylgir þessu kostnaður en ef maður eltir ekki draumana þá er lífið litlaust. Það sem ég vonast eftir er að koma andlega og líkamlega betur út úr þessu. Það er mikil áskorun að sigla í einu erfiðasta siglingaumhverfi í heimi en það er eitthvað sem hefur verið draumur minn lengi. Ef ég safna nógu mörgum atkvæðum eru möguleikarnir á að komast í úrslitahópinn sem valið verður úr hver hreppir sætið í keppninni góðir," segir hann.

Biður Íslendinga um aðstoð - kosning á netinu

"Mig langar að hvetja sem flesta til að fara inn á síðuna mína, kjósa og staðfesta svo í tölvupóstinum sem kemur til þeirra í kjölfarið. Vinir mínir á facebook hafa verið einstaklega duglegir að deila síðunni og kjósa, svo takk til þeirra allra. Að eiga möguleika að taka þátt í einum legg þessara miklu keppni er ævintýri og draumur."

"Sem stendur er ég í 17. sæti af 180 en sú sem trónir á toppnum er með 1667 athvæði en ég er með 454 svo það er nóg eftir."

Þakklátur og bjartsýnn

"Það sem er mikilvægt er að kjósa með tölvuskeyti og staðfesta svo í tölvupóstinum en þá aukast möguleikarnir að ég komist í lokahópinn og þar get ég sannað að ég eigi heima í þessari keppni. Svo kemur í ljós í maí hvort draumur minn verður að veruleika. En takk til allra sem hafa kosið mig," segir Snorri þegar við kveðjum hann.

Smelltu hér ef þú vilt kjósa Snorra:Hér getur þú aðstoðað Snorra við að láta drauminn hans rætast. VOTE NOW stendur hægra megin á síðunni. Þú smellir á linkinn, setur inn netfangið þitt og staðfestir svo í svari þegar þú færð tölvupóst um staðfestingu.