Trúlofuðu sig í lautarferð

Tónlistarkonan Linda Perry og leikkonan Sara Gilbert trúlofuðu sig á dögunum.

Perry gerði garðinn frægan á tíunda áratug síðustu aldar með hljómsveitinni 4 Non Blondes, en í seinni tíð hefur hún einbeitt sér að lagasmíðum fyrir aðra. Má þar nefna Christinu Aguilera, Courtney Love og Pink.

Gilbert er umsjónarmaður spjallþáttarins The Talk á sjónvarpsstöðinni CBS auk þess sem hún lék dóttur Roseanne Barr í þáttunum Roseanne á níunda áratugnum.

Gilbert bað Perry í almenningsgarði, en þær voru í lautarferð þegar fólk í næsta nágrenni kom með hljóðfæri spilandi lagið Love Song eftir hljómsveitina The Cure. Fólkið var á vegum Gilbert, sem bar upp spurninguna og fékk svarið sem hún vonaðist eftir.