Útlán ÍLS aukast í fyrsta sinn milli ára í langan tíma

Heildarútlán Íbúðalánasjóðs (ÍLS) námu 1.058 milljónum króna í febrúar en þau námu tæpum milljarði í sama mánuði í fyrra. Þetta er í fyrsta sinn í langan tíma að útlán sjóðsins aukast milli ára í einstökum mánuði.

Þetta kemur fram í mánaðarskýrslu ÍLS fyrir febrúar. Þar segir að greiðslur Íbúðalánasjóðs vegna íbúðabréfa og annarra skuldbindinga námu rúmum 10,3 milljörðum króna í febrúar. Uppgreiðslur námu rúmum 1,8 milljörðum króna.

Í lok febrúar 2013 hafði hlutfall lána í vanskilum einstaklinga lækkað áttunda mánuðinn í röð frá því að vanskil í lánasafni Íbúðalánasjóðs náðu hámarki í júlí síðastliðnum.

Í lok febrúar 2013 nam fjárhæð lána einstaklinga í vanskilum tæpum 4,7 milljörðum króna. Þetta samsvarar 0,2% lækkun frá fyrra mánuði.

Heimili í vanskilum eru 4.703 og þar af eru 606 heimili með frystingu á lánum sínum. Alls voru því 9,2% þeirra heimila sem eru með fasteignalán sín hjá Íbúðalánasjóði með lánin í vanskilum í lok febrúar 2013 (var 11,8% í febrúar 2012). Það er 2,6% lægra hlutfall heimila en í lok febrúar 2012.

Í lok febrúar nam fjárhæð vanskila útlána til lögaðila alls um 2,8 milljörðum króna sem samsvarar 0,2%% hækkun frá fyrri mánuði en er 1,2% lægra hlutfall en í lok febrúar 2012.

Vanskil eða frystingar ná samtals til 14,87% lánasafnsins, en sambærilegt hlutfall í janúar 2012 nam 15,42%.