Allar nothæfar leiguíbúðir í útleigu

Það er misskilningur að Íbúðalánasjóður liggi á leiguhæfum eignum og komi þeim ekki á leigumarkað. Allar leiguhæfar íbúðir í blokkum á Selfossi sem fjallað var um í kvöldfréttum Stöðvar 2 og Vísis í gær eru nú þegar í útleigu, segir í orðsendingu Íbúðalánasjóðs vegna fréttarinnar.

Þar segir að langflestar eignir sem sjóðurinn taki yfir þarfnist lagfæringa og margar verulegra endurbóta. Þótt hægt sé að selja fasteignir á misjöfnu byggingarstigi eða í lélegu ástandi sé ekki forsvaranlegt að bjóða slíkar íbúðir til leigu. Íbúðir sjóðsins sem ekki eigi að selja og séu orðnar hæfar til útleigu séu auglýstar eins fljótt og unnt er.

Blokkir í slæmu ástandi

Í kvöldfréttum Stöðvar 2 í gær var fjallað um fjölbýlishús á Selfossi. „Umræddar blokkir á Selfossi reyndust í mun verra ástandi en gert var ráð fyrir og voru ekki hæfar til útleigu. Brunaþéttingar með lögnum standast ekki byggingarreglugerð, gólfefni eru ónothæf í leiguíbúðir og þarf að skipta um þau og margar íbúðir eru án þröskulda, svo fátt eitt sé nefnt," segir í orðsendingunni.

Kerfisbundið unnið að standsetningu

Þá segir að eignasvið Íbúðalánasjóðs vinni kerfisbundið að því að meta, standsetja og skrá íbúðir og eftirspurn ráði á hverju svæði miklu um forgangsröðun þeirra verkefna. Á Selfossi hafi íbúðir til leigu komið reglulega inn frá síðasta hausti. Eftirspurn á svæðinu hafi hinsvegar verið mjög sveiflukennd og mikil hreyfing er á leigjendum. Til dæmis hafa um 35 leigjendur horfið úr leigu hjá sjóðnum á þessu svæði síðan í haust.

Unnið er að endurgerð 8 íbúða í umræddum blokkum sem fara í útleigu um leið og þær eru tilbúnar. Fjórar nýuppgerðar íbúðir verða boðnar til leigu í þessari viku og er áhugasömum bent á að fylgjast með fasteignasíðum á mbl.is og fasteignir.is. Hægt er að skoða úthlutunarreglur leiguíbúða á heimasíðu Íbúðalánasjóðs, www. ils.is