Gjaldþrotum hefur fækkað um 28% í ár miðað við síðasta ár

Alls voru 79 fyrirtæki tekin til gjaldþrotaskipta í febrúarmánuði, flest í heild- og smásöluverslun og viðgerðum á vélknúnum ökutækjum.

Þetta kemur fram á vefsíðu Hagstofunnar. Þar segir að fyrstu 2 mánuði ársins var fjöldi gjaldþrota 141, sem er rúmlega 28% fækkun frá sama tímabili í fyrra þegar 196 fyrirtæki voru tekin til gjaldþrotaskipta.

Í febrúarmánuði voru skráð 149 ný einkahlutafélög, flest í heild- og smásöluverslun og viðgerðum á vélknúnum ökutækjum. Til samanburðar voru 154 ný einkahlutafélög skráð í febrúar 2012. Fyrstu 2 mánuði ársins var fjöldi nýskráninga 327, en það er rúmlega 8% aukning frá sama tíma í fyrra þegar 302 fyrirtæki voru skráð.