Hörð átök um stjórnarskrármálið

Hörð átök hafa átt sér stað í umræðum um stjórnarskrárfrumvarpið á Alþingi í dag, en nú fer lokatilraun þeirra sem vilja að frumvarpið verði afgreitt í heild sinni fram á þingi, en stefnt er að því að ljúka annarri umræðu nú síðdegis. Þór Saari hefur lagt fram vantrauststillögu vegna nýrrar tillögu stjórnarmeirihlutans um að klára ekki heildarendurskoðun stjórnarskrárinnar nú.

Ásmundur Einar Daðason Framsóknarflokki mælti fyrir málamiðlunartillögu Framsóknarflokksins um annað auðlindaákvæði en er í frumvarpinu og féll það í vægast sagt grýttan jarðveg og kallaði á hörð viðbrögð stuðningsmanna frumvarpsins, ekki síst hjá gömlum samflokksfélögum Ásmundar Einars í Vinstri grænum. Ákvæðið felur í sér tillögu auðlindanefndar frá árinu 2000 að því viðbættu að aldrei megi afsala ákvörðun á auðlindum til alþjóðlegra stofnana.

Björn Valur Gíslason þingflokksformaður Vinstri grænna sagði rétt hjá Ásmundi að ekki ætti að gera stjórnarskrá fyrir einstaka flokka og þess vegna hefði þjóðin verið fengin í málið.

„Ég held að ég hafi aldrei heyrt Framsóknarflokkinn, þennan hokna aldna, spillta stjórnmálaflokk leggjast eins lágt og í þessum umræðum í dag. Ég held að það sé leitun að öðrum eins aumingjaskap og háttvirtir þingmenn Framsóknarflokksins eru að leggja fram með þessari tillögu hér um að nýting á þjóðarauðlindum séu óbein einkaeignarréttindi þeirra sem fá að njóta þess," sagði Björn Valur Gíslason, þingmaður VG.

Ásmundur sagði að það ætti að ná fram breytingu á stjórnarskránni með samstöðu. Nú stendur yfir umræða um frumvarp formanna Samfylkingar, Vinstri grænna og Bjartrar framtíðar um að ákvæði um hvernig breyta skuli stjórnarskrár verði breytt, þannig að næsta þing geti haldið áfram þeirri vinnu sem hvílir á bakvið stjórnarskrárfrumvarið, og því þurfi ekki að boða til nýrra kosninga að loknum þeim næstu til að breyta stjórnarskránni. Atkvæðagreiðsla um þetta frumvarp flokksleiðtoganna, ræður í raun örlögum stjórnarskrárfrumvarpsins.