Verðbólgan mælist 4,8%, hækkar langt umfram spár

Ársverðbólgan mælist 4,8% í þessum mánuði og hækkar um 0,6 prósentur frá fyrri mánuði. Þetta er mun meiri hækkun en sérfræðingar gerðu ráð fyrir en spár þeirra láu á bilinu frá óbreytti stöðu til lítilsháttar hækkunnar.

A vefsíðu Hagstofunnar segir að vísitala neysluverðs miðuð við verðlag í febrúar 2013 er 409,9 stig og hækkaði um 1,64% frá fyrra mánuði. Vísitala neysluverðs án húsnæðis er 391,9 stig og hækkaði um 2,03% frá janúar.

Vetrarútsölum er víða að ljúka og hækkaði verð á fötum og skóm um 10,3% (vísitöluáhrif 0,55%). Verð á bensíni og díselolíu hækkaði um 5,3% (0,31%), verð á dagvörum hækkaði um 0,9% (0,15%) og verð á nýjum bílum hækkaði um 2,1% (0,12%).

Síðastliðna tólf mánuði hefur vísitala neysluverðs hækkað um 4,8% og vísitalan án húsnæðis um 5,6%. Undanfarna þrjá mánuði hefur vísitala neysluverðs hækkað um 2,0% sem jafngildir 8,1% verðbólgu á ári (9,1% verðbólgu á ári fyrir vísitöluna án húsnæðis).