Forstjóri Straums lætur af störfum

Pétur Einarsson hefur látið af störfum hjá Straumi fjárfestingabanka og ákveðið hefur verið að Jakob Ásmundsson muni taka við. Starfsfólki var tilkynnt þetta í upphafi starfsdags. Greint var frá því í gær að Pétri hefur verið meinað að stýra fyrirtæki í Bretlandi næstu fimm árin, en honum er gefið að sök skattalagabrot.

Pétur Einarsson hefur gegnt starfi forstjóra Straums frá 2011. Í tilkynningu frá Straumi segir að Pétur og stjórn bankans séu sammála um að umfjöllun sem varðar lok viðskipta hans í Bretlandi kynni að skaða hagsmuni Straums. Því var ákveðið að bregðast við með framangreindum hætti.

Jakob Ásmundsson, sem verið hefur framkvæmdastjóri fjármála- og rekstrarsviðs Straums að undanförnu, er 38 ára að aldri, doktor í iðnaðarverkfræði frá Purdue háskóla í Bandaríkjunum. Hann réðst til Straums á árinu 2005 sem framkvæmdastjóri áhættustýringar. Jakob hefur gegnt ýmsum framkvæmdastjórastöðum hjá Straumi á liðnum átta árum.