Ávöxtun lífeyrissjóðs verzlunarmanna nam 13%

Ávöxtun eigna lífeyrissjóðs verzlunarmanna var 13,4% á síðasta ári sem svarar til 8,5% hreinnar raunávöxtunar. Hrein raunávöxtun síðast liðin 10 ár nam 3,9%. Fjárfestingartækifærum fjölgaði á árinu og innlendur hlutabréfamarkaður efldist. Þetta kemur fram í tilkynningu frá sjóðnum vegna uppgjörs fyrir síðasta ár. Gjaldeyrishöft hamla þó enn nokkuð uppbyggingu og setja mark sitt á starfsemi sjóða eins og Lífeyrissjóðs verzlunarmanna.

Eignir yfir 400 milljarðar

Í lok ársins voru eignir um 402 milljarðar samanborið við 345 milljarða árið áður. Eignir jukust þannig um rúma 56 milljarða á árinu.

Eignir sjóðsins dreifast þannig að um 28% af eignum sjóðsins er í dreifðu safni erlendra verðbréfa, 29% í innlendum ríkistryggðum skuldabréfum, 10% í safni sjóðfélagalána og 9% í bankainnstæðum. Innlend hlutabréfaeign jókst nokkuð á árinu og nemur nú um 12% af eignum sjóðsins. Önnur skuldabréf eru samtals 12% af eignum.

Tryggingafræðileg staða lífeyrissjóðsins hefur batnað undanfarin ár, segir í tilkynningu frá sjóðnum. Um nýliðin áramót var hún metin -0,4% samanborið við -2,3% árið 2011 og -3,4% árið 2010. Staða sjóðsins í þessu tilliti kallar því ekki á breytingar á lífeyrisgreiðslum.

Greiðslur til sjóðfélaga um átta milljarðar á ári

„Meginhlutverk Lífeyrissjóðs verzlunarmanna er að greiða lífeyri til sjóðfélaga á grundvelli réttinda sem þeir ávinna sér með greiðslu iðgjalda til sjóðsins. Á liðnu ári greiddu rúmlega 48 þúsund sjóðfélagar til sjóðsins en alls eiga um 147 þúsund manns réttindi hjá sjóðnum. Mikill meirihluti sjóðfélaga er enn að byggja upp réttindi sín til lífeyris. Því eru inngreidd iðgjöld enn talsvert hærri fjárhæð en útgreiddur lífeyrir.

Árið 2012 greiddi lífeyrissjóðurinn um átta milljarða í lífeyri til rúmlega ellefu þúsund sjóðfélaga. Lífeyrisgreiðslur hækkuðu um nær 15% frá fyrra ári. Á sama tíma námu greidd iðgjöld til sjóðsins nær 18 milljörðum sem er heldur hærri fjárhæð en árið áður," segir í tilkynningu frá sjóðnum.