Á áratug fóru 840 íbúðir á Suðurnesjunum undir hamarinn

Alls voru 840 íbúðir seldar nauðungarsölu á Suðurnesjunum á árunum 2001 til 2011. Þetta kemur fram í rannsókn sem gerð var á vegum velferðarráðuneytisins.

Þar kemur fram að hlutfall nauðungarsölumála sem lauk með sölu eignar fór á fyrri hluta tímabilsins hæst í 10,5% á ári, en stighækkaði árin 2008 til 2011, úr 5,8% árið 2007 í tæp 43% árið 2011. Rúmlega 70% af þessum íbúðum voru í eigu einstaklinga.

Fram kemur að á öllu tímabilinu var áberandi að fólk missir húsnæði sitt á nauðungarsölu einu til þremur árum eftir íbúðarkaupin.

Fjallað er um málið á vefsíðu stjórnarráðsins. Þar segir að meðalaldur þeirra einstaklinga sem misstu húsnæði sitt á nauðungarsölu var á öllu tímabilinu um 40 ár og hefur farið hækkandi, úr 36 árum 2009 í 43 ár 2011.

Fjölskyldugerð þeirra sem misstu íbúðir sínar á tímabilinu skiptist þannig að í um 40% tilvika voru eigendur í sambúð eða hjónabandi og í tæpum helmingi voru börn á heimilinu, alls 560 börn. Í rúmlega fimmtungi tilvika áttu börn lögheimili í hinni seldu íbúð.

Eigendur voru í 45,2% tilvika með lögheimili í hinni nauðungarseldu íbúð á degi nauðungarsölunnar. Þegar lögaðili er eigandi húsnæðis sem selt er, er líklegast að leigutaki hafi misst húsnæði sitt við sölu. Ekki reyndist unnt að fá upplýsingar um stöðu þess hóps.