Seðlabankinn dregur verulega úr væntingum um hagvöxt

Endurskoðuð spá í Peningamálum Seðlabankans sem birt var í dag gerir því ráð fyrir að hagvöxtur í fyrra hafi verið 2,2% í stað 2,5% í nóvemberspá bankans. Horfur fyrir þetta ár hafa að sama skapi versnað og er nú spáð 2,1% hagvexti í ár í stað tæplega 3% í nóvember. Skýrast lakari horfur í ár einkum af hægari vexti fjárfestingar í orkufrekum iðnaði en einnig vegur hægari vöxtur einkaneyslu nokkuð þungt.

Í Peningamálum segir að nokkuð dró úr alþjóðlegum efnahagsumsvifum í lok síðasta árs, sérstaklega í ríkjum sem reiða sig á útflutning til evrusvæðisins, þar sem útflutningur dróst saman og viðhorfsvísitölur lækkuðu. Svipuð þróun varð hér á landi og benda nýjustu hagvísar til þess að hagvöxtur í fyrra hafi verið heldur minni en áður hafði verið talið.

Í spánni núna er gert ráð fyrir að nokkur hluti fjárfestingar í orkufrekum iðnaði færist frá þessu ári yfir á árin 2014-15 og því hafa hagvaxtarhorfur glæðst lítillega á seinni hluta spátímans. Nú er gert ráð fyrir u.þ.b. 3¾% hagvexti að meðaltali þessi tvö ár í stað 3½% í nóvember. Eftir sem áður er landsframleiðslan á öllum spátímanum minni en í nóvemberspánni.

„Þótt hjöðnun atvinnuleysis hafi í meginatriðum verið í takt við fyrri spá Seðlabankans, hefur fjölgun heildarvinnustunda verið nokkru hægari en gert hafði verið ráð fyrir. Hægari efnahagsumsvif leiða til þess að heildarvinnustundum fjölgar minna og atvinnuleysi hjaðnar hægar en spáð var í nóvember. Verðbólguhorfur hafa hins vegar lítið breyst og er áfram gert ráð fyrir tiltölulega hægri hjöðnun verð­bólgu, þar sem í meginatriðum vegast á áhrif töluvert lægra gengis krónunnar og meiri slaki í þjóðarbúinu en gert var ráð fyrir í nóvember," segir í Peningamálum.

„Þótt líkur á stórfelldum áföllum eins og upplausn evrusvæðisins eða snarpri aukningu aðhalds í ríkisfjármálum í Bandaríkjunum hafi minnkað töluvert, ríkir enn mikil óvissa í alþjóðlegum efnahags­málum. Ástand á helstu útflutningsmörkuðum Íslendinga hefur versnað, einkum í Evrópu, og viðskiptakjör eru lakari en áður var reiknað með. Útflutningstekjur hafa því verið minni sem á þátt í veikara gengi krónunnar að undanförnu."